Svandís Svavarsdóttir, heilbrigðisráðherra, mun stíga tímabundið til hliðar eftir fund ríkisstjórnarinnar í dag vegna veikinda innan fjölskyldunnar. Stundin greindi fyrst frá.
Svandís greindi frá því í sumar að dóttir hennar, Una Torfadóttir, hafi greinst með alvarleg veikindi, heilaæxli sem reyndist vera krabbamein. Svandís greindi frá í færslu á Facebook þar sem hún sagði :
„Kæru vinir, nýlega greindist Una dóttir mín með heilaæxli sem reyndist vera krabbamein. Nú tekur við löng og ströng krabbameinsmeðferð. Mitt verkefni verður að styðja hana í því ferli ásamt fjölskyldu og vinum. Þetta er stærsta verkefni lífs míns.
Ég ætla, með hjálp samstarfsfólks og fjarfunda, að sinna áfram störfum heilbrigðisráðherra og mun skipuleggja mína vinnu á næstunni í samræmi við breyttar aðstæður.
Vísa má í þessa færslu en ég mun ekki fjalla meira um þetta mál opinberlega að svo stöddu.“
Stundin vísar til þess að hafa heimildir fyrir því að frekari veikindi hafi komið upp í fjölskyldu Svandísar og það, auk veikinda Unu, hafi orðið til þess að hún tók ákvörðun um að stíga nú tímabundið til hliðar til 15. október.
Guðmundur Ingi Guðbrandsson, umhverfis- og auðlindaráðherra, mun gegna störfum Svandísar í fjarveru hennar.