„Það er komin upp stórmerkileg staða í varnarbaráttu okkar sem samfélags gegn veirunni“
Þetta segir Björn Ingi Hrafnsson, ritstjóri Viljans og höfundur bókarinnar Vörn gegn Veiru, á Facebook-síðu sinni í dag.
„Sóttvarnalæknir telur sérstaklega varasamt við þessar aðstæður að opna líkamsræktarstöðvar. Hann segir að smit innan veggja þeirra hafi verið ein helsta uppistaðan í þeirri bylgju sem við höfum verið að kljást við undanfarnar vikur og sér ekki fyrir endann á,“ segir Björn Ingi sem hefur verið duglegur að tjá sig um aðgerðir gegn veirunni í faraldrinum.
„En nú ber svo við að skrifstofufólk í heilbrigðisráðuneytinu (á ábyrgð heilbrigðisráðherra) er ekki sammála honum og ætlar víst að leyfa opnun líkamsræktarstöðvanna í dag,“ segir hann og veltir því fyrir sér hvort þetta skrifstofufólk geti ekki gengið lengra.
„Er ekki þá rétt að þetta sama skrifstofufólk mæti á næstu upplýsingafundi og fari yfir með okkur hvernig það vill tækla næstu skref?“