Stjórn Brims hefur ákveðið að 1.9 milljarðar verði greiddir út í arðgreiðslur til hluthafa sinna vegna rekstrarársins 2019. Verður arðurinn greiddur út þann 30. apríl samkvæmt tilkynningu á vef fyrirtækisins, en þetta var samþykkt á aðalfundi Brims í gær:
„Samþykkt að á árinu 2020 verði vegna rekstrarársins 2019 greiddar 1,0 kr. á hlut í arð til hluthafa, eða 1.899 millj. kr. (um 14,0 millj. evra á lokagengi ársins 2019), eða 2,6% af markaðsvirði hlutafjár í lok árs 2019. Arðurinn verði greiddur 30. apríl 2020. Síðasti viðskiptadagur þar sem arður fylgir bréfunum er 31. mars 2020 og arðleysisdagur því 1. apríl 2020. Arðsréttindadagur er 2. apríl 2020. Arður greiðist þeim sem skráðir eru í hlutaskrá félagsins í lok arðsréttindadags.“
Þá var einnig samþykkt að þóknun stjórnarmanna á næsta ári yrði 300 þúsund krónur á mánuði. Fær varaformaður 450 þúsund og formaður 600 þúsund.
Þá var einnig kosið í stjórn félagsins, en þar voru kjörin Anna G. Sverrisdóttir, Guðmundur Kristjánsson, Kristján Þ. Davíðsson, Kristrún Heimisdóttir og Magnús Gústafsson.
Brim er meðal fyrirtækja sem metin eru þjóðhagslega mikilvæg og fá undanþágu frá samkomubanni vegna Covid-19 faraldursins.