Lúðvík Bergvinsson, héraðsdómslögmaður og fyrrverandi þingflokksformaður Samfylkingarinnar, tók alls 33 milljónir árið 2019 fyrir að fylgjast með að skilyrðum í sáttinni sem gerð var við Samkeppniseftirlitið þegar N1 keypti Festi, og fylgja henni eftir. Fréttablaðið greinir frá en þetta kemur fram í kynningu stjórnarformanns Festar, Margrétar Guðmundsdóttur, á aðalfundi félagsins á mánudag.
Samkeppniseftirlitið skipaði Lúðvík í kjölfar sáttarinnar við N1 um kaup þess á Festi árið 2018, sem óháðan kunnáttumann sem hafa ætti eftirlit með þeim skilyrðum sem fram komu í sáttinni, en heildarkostnaður Festar af störfum Lúðvíks fyrir síðari hluta ársins 2018 og allt árið í fyrra nam alls 41 milljón króna, en samkvæmt sáttinni lýkur störfum Lúðvíks ekki fyrr en sumarið 2023.
Lúðvík óskaði hinsvegar eftir leyfi til að afla sér utanaðkomandi sérfræðiaðstoðar vegna starfa sinna, þar sem hann skorti þekkingu á olíuviðskiptum. Féllst Samkeppniseftirlitið á það, en Festi kærði þá ákvörðun til áfrýjunarnefndar samkeppnismála, þar sem Lúðvík gæti vel sinnt sínu eftirliti án aðstoðar.
Þeirri kröfu var hinsvegar frestað og fékk Lúðvík þá aðstoð sem hann þurfti.
Sjálfstæðismaðurinn og fjölmiðlamaðurinn Björgvin Guðmundsson, einn eiganda almannatengslafyrirtækisins KOM, baunar á Lúðvík á Twitter vegna fréttarinnar:
Pínu sweet að vera kunnáttumaður á spena Samkeppniseftirlitsins, sem mjólkar svo einkageirann. @frettabladid_is pic.twitter.com/VUSkQwadwy
— Bjorgvin Gudmundsson (@BjorgvinG) March 25, 2020
