Ég hef verið á ferðalagi á Norðausturlandi. Kom í Öxarfjörð, út á Melrakkasléttu, á Raufarhöfn og Þórshöfn, síðan Vopnafjörð og þaðan á hálendið Norðaustanlands, Jökuldalsheiði, Dettifoss, Mývatn.
Við vorum að taka upp sjónvarpsefni. Það sætir kannski undrum en alla dagana hefur viðrað ágætlega til þess. Það hefur verið góð fjallasýn – við sáum vítt og breitt yfir Melrakkasléttuna
Við Rauðanúp nyrst á Sléttu ólst rithöfundurinn Guðmundur Magnússon upp í fátækt – hann tók sér síðar nafnið Jón Trausti. Einn drangurinn á myndinni er reyndar stundum kallaður Jón Trausti.
Í kirkjugarðinum á Hofi í Vopnafirði er Kristján Fjallaskáld grafinn. Þótt hann hafi verið aðeins 27 ára þegar hann dó kemur hann mjög víða við sögu á Norðausturlandi. Hann fæddist í Kelduhverfi, dó á Vopnafirði, er kenndur við Hólsfjöll þar sem hann var í vinnumennsku, orti frægt kvæði um Dettifoss.
Þegar komið var upp í fjöllin blasti Herðubreið við. Ég hitti Spánverja sem sagðist hafa farið sjö sinnum um Möðrudal en aldrei séð þessa drottningu íslenskra fjalla.
Á Mývatni var svo mývargurinn í ferlegum ham. Kominn haustfílingur í hann og hann er fram úr hófi ágengur. Ég fékk flugu í augað og gleypti tvær. Ég held ég sé ennþá með flugur einhvers staðar innanklæða.
Mig langar samt mest að birta þessa mynd. Þetta er altaristaflan í kirkjunni á Möðrudal. Hana byggði Jón Stefánsson bóndi með eigin höndum, málaði altaristöfluna og spilaði á orgelið. Menn gerðu löngum grín að myndinni – sagt var að hún sýndi Jesú renna sér. En ég ætla að staðhæfa að þetta sé flottasta altaristafla í kirkju á Íslandi, algjörlega einstök i sinni röð.