Björn Leví Gunnarsson, þingmaður Pírata, telur að nýskipaður seðlabankastjóri, Ásgeir Jónsson, eigi óuppgerða fortíð úr hruninu og segir að ekki hafi verið tekið tillit til trausts og trúverðugleika í ráðningaferlinu hjá Ásgeiri:

„Til hamingju og allt það …En, ég hélt að markmið stjórnvalda væri að auka traust og trúverðugleika. Ég held að það sé frekar augljóst, sama hversu ósanngjarnt það getur verið, að nýráðinn seðlabankastjóri, er með óuppgerða fortíð varðandi einmitt traust og trúverðugleika. Batnandi mönnum er best að lifa, auðvitað, og allir eiga að fá tækifæri aftur ef þeir sýna betrun. Ég veit ekki með aðra en ég man ekki eftir neinu. Það getur auðvitað verið vandamál mín megin. Allavega, ef markmiðið er að auka traust á stjórnmálum þá hlýtur það að verða að vera hluti af hæfniskröfum. Ég er ekki viss um að það hafi verið tekið tillit til þess í þessu tilfelli.“

Fortíðin sem Björn Leví vísar til er væntanlega tími Ásgeirs hjá Kaupþingi (Arion), frá 2004-2011, sem forstöðumaður greiningadeildar og aðalhagfræðingur. Í skýrslu rannsóknarnefndar Alþingis um hrunið segir, að á þessum árum hafi Kaupþing kostað starf lektors  við hagfræðideild Háskóla Íslands, en Ásgeir gegndi lektorsstöðunni samhliða störfum sínum fyrir greiningardeild bankans.