Í fréttaskýringu Kjarnans er greint frá því að af 70 nefndum, stjórnum og ráðum félagsmálaráðuneytisins, hafi alls 21 verið skipaður formaður án tilnefningar, með tengsl við Framsóknarflokkinn. Ásmundur Einar Daðason, félags- og barnamálaráðherra, hefur skipað níu þeirra og forveri hans, Eygló Harðardóttir, skipaði hina tólf.

Þá er nefnt að Ásmundur hafi skipað formenn þriggja stjórna, alla með tengsl við Framsóknarflokkinn, auk þess sem hann skipaði aðstoðarmann sinn sem formann stjórnar Tryggingarstofnunar ríkisins.

Frá árinu 1995 hefur Framsóknarflokkurinn farið með félagsmálaráðuneytið í 17 ár af 24 og hafa þeir átt sex félagsmálaráðherra á þeim tíma.

Glufa í lögunum

Var Ásmundur gagnrýndur fyrir að skipa í þrjár stöður innan ráðuneytisins án þess að auglýsa þær, þar sem Bandalag háskólamanna (BHM) benti á að auglýsingaskylda væri meginreglan við ráðningar í störfum hins opinbera. Ásmundur hinsvegar nýtti sér heimild í lögum um réttindi og skyldur starfsmanna ríkisins, um að flytja megi fólk á milli embætta án auglýsinga. Það sagði BHM að væri ekki meginreglan og þessi glufa bryti í raun í bága við jafnræðisreglur:

„­Þrátt fyrir að lög heim­ili annað þá eru það vand­aðir stjórn­sýslu­hættir að aug­lýsa þegar til stendur að ráð­stafa tak­mörk­uðum gæð­um, sem fyr­ir­sjá­an­legt er að færri geta fengið en vilja. Með aug­lýs­ingu er öllum sem áhuga hafa og upp­fylla skil­yrði gefið tæki­færi á að sækja um. Að mati banda­lags­ins brjóta rúmar und­an­tekn­ing­ar­heim­ildir við aug­lýs­ingar á lausum störfum hjá hinu opin­bera í bága við jafn­ræð­is­reglur stjórn­sýslu­réttar ásamt því að draga úr gagn­sæi í stjórn­sýsl­unn­i,“

sagði í yfirlýsingu BHM af því tilefni.

Ekkert óeðlilegt við pólitískar skipanir

Ásmundur segir við Kjarnann að það sé ekkert óeðlilegt við pólitískar skipanir í nefndir, ráð eða hópa á vegum ráðuneytisins:

„Þegar pólitískar nefndir eru skipaðar þá er horft til þess að skipa þær pólitískt, það er ekkert óeðlilegt við það.“

Þá hefur Kjarninn eftir Ásmundi að þegar um sé að ræða nefndir sem ekki marki pólitíska stefnu, séu þær yfirleitt skipaðar embættismönnum, en hann gat ekki svarað því hversu margar nefndir af þeim 70 sem starfi á hans vegum í ráðuneytinu, væru pólitískar.