Langtímaáhrif af tilraunaverkefni með rafhjól í Reykjavík eru jákvæð. Reykjavíkurborg lánaði sumarið 2018 íbúum rafhjól til reynslu og ári síðar höfðu 21% þátttakenda breytt ferðahegðun sinni og notuðu rafhjól til að komast til og frá vinnu, segir í tilkynningu frá borginni.
Tilgangurinn með því að lána rafhjól var að fá fram hvort þau myndu geta breytt ferðahegðun umfram aðra valkosti og gert samgöngur umhverfisvænni. Þeir sem fengu rafhjól að láni svöruðu spurningum fyrir tímabilið, meðan á því stóð og að því loknu. Meðal annars var spurt um ferðamáta til og frá vinnu.
Kristinn J. Eysteinsson, verkefnisstjóri samgöngumála hjá umhverfis- og skipulagssviði segir niðurstöðurnar lofa góðu um breytingar. Áður en lánstímabil hófst notuðu 85% þátttakenda í tilrauninni bíl að jafnaði til að komast til og frá vinnu. Ári síðar eða sumarið 2019 var þessi tala komin niður í 58% meðal þátttakenda.
Kristinn segist spenntur að sjá hverjar verði niðurstöður endurtekinnar tilraunar núna eftir sumarið 2019, en sami fjöldi eða 125 einstaklingar fengu rafhjól til afnota og árið áður. Niðurstöður fyrir 2019 muna liggja fyrir um mitt næsta ár.
Tilgangur þessara rannsókna er einnig að draga fram hvort innviðir vegna hjólreiða henti rafhjólum og segir Kristinn að niðurstaðan sé í stuttu máli sú að fólk upplifi sig jafn öruggt á rafhjóli og á venjulegu hjóli.
Reykvíkingar eru áhugasamir um rafhjól, en alls bárust rúmlega þúsund umsóknir í fyrra og voru konur voru í meirihluta umsækjenda. Áhugi er einnig í flestum aldurshópum og öllum hverfum borgarinnar, auk þess sem nokkuð var um umsóknir frá íbúum nágrannasveitarfélaga.
Þátttakendur sögðust upplifa jákvæð áhrif á bæði heilsu og líðan. Þeir töldu sig líklegri til að notast við rafhjól og ólíklegri til að notast við einkabíl eftir reynslu sína af rafhjóli.
Þátttakendur voru líklegri til að nota hjól lengur fram á haust og töldu sig geta byrjað að hjóla fyrr á vorin.
