Sumir líta á kvikmyndina Jóker sem herhvöt, sérlega afhjúpun kapítalismans, hinn verðandi Jóker drepur þrjár verðbréfasalatýpur – það er eiginlega eins og þeir séu réttdræpir – reyndar líka móður sína og að líkindum tvær svartar konur sem hafa ekki gert honum neitt nema verða á vegi hans eða leika hlutverk í rugluðum hugmyndaheimi hans. Eins og margir gagnrýnendur hafa bent á er holur hljómur í þessari mynd sem er auðvitað framleidd af milljarðafyrirtæki.
Kapítalisminn hefur lag á að taka allt og breyta því í varning, og ofurhetjumyndir eru fyrst og fremst varningur, eins og þeir benda á Scorsese, Coppola og Loach. Jókerinn er dálítð öðruvísi – en samt. Nú líður að hrekkjavöku og þá er það Jókerinn sem er eftirsóttasti búningurinn. Alls staðar munu börn fara um og sníkja sælgæti í Jókerbúningum.
Og þá breytir engu þótt hann sé það sem kallast fjölda- eða raðmorðingi.
Hrekkjavakan er 31. október.