Samkvæmt ársreikningi Kaupþings ehf. fyrir 2018, félagi sem heldur utan um eftirstandandi eignir hins fallna banka, höfðu um 6400 kröfuhafar ekki sótt þær greiðslur sem þeir áttu rétt á um síðustu áramót, samkvæmt nauðsamningi frá 2015. Kjarninn greinir frá.

Í lok janúar geymdi félagið alls um 8.5 milljarða króna á gengi dagsins í dag. Þar af voru 27.2 milljónir evra í reiðufé og 29.2 milljónir punda í breytanlegum skuldabréfum á vörslureikningi, sem átti að mæta greiðslum til þeirra kröfuhafa sem ekki höfðu sótt fé sitt.

Kaupþing ehf. hefur þegar greitt út rúma 422 milljarða til skuldabréfaeigenda sinna, miðað við gengi dagsins í dag, eða um 2.621.9 milljónum punda, með reiðufé og lækkun á höfuðstól breytanlegra skuldabréfa.

Þá hafa eignir félagsins aukist á þessu ári, en Kaupþing fékk tæpa 16 milljarða á núvirði í janúar þegar sam­komu­lag náð­ist við Robert Tchengu­iz, en hann var stærsti lán­tak­andi bank­ans fyrir hrun.

Þá má nefna að starfsmenn Kaupþings ehf. eru 17 talsins og fengu þeir samtals greidda rúma 3.5 milljarða fyrir störf sín í fyrra, þó svo fækkað hefði í hópnum, en það er aukning um 900 milljónir frá árinu áður. Þar af fékk forstjórinn og stjórn félagsins 1.216 milljónir fyrir sín störf.

Sjá nánar: Týndar blaðsíður ársreiknings Kaupþings komnar fram:Greiddu 17 starfsmönnum 3.5 milljarða í laun