Jafnan er dregið um sætaskipan Alþingis þegar það kemur saman, líkt og í mörgum leik- og grunnskólum, enda störfum á Alþingi gjarnan líkt við sandkassaleik. Dregið var í sæti á þriðjudag og er athyglisvert að sjá hverjir lenda saman sem sessunautar og jafnvel enn áhugaverðara að sjá hverjir lentu ekki saman.
Þegar hefur verið greint frá mismikilli ánægju þingmanna með sessunauta og hefur Rósa Björk Brynjólfsdóttir, VG, þegar sakað Brynjar Níelsson um karlrembu fyrir að segjast aðeins getað talað um fótbolta við Willum Þór Þórsson, Framsóknarflokki, en Rósa lék um árabil í efstu deild í knattspyrnu:
„BN ætlar bara að tala um fótbolta v Willum Þór. Veit greinilega ekki að ég æfði fótbolta í mörg ár m Breiðablik, margfaldur Íslandsmeistari og var í U17 landsliðinu. En auðvitað er ekki hægt að tala um fótbolta v kjellingar.. Nenni ekki að tala v rembur..“
BN ætlar bara að tala um fótbolta v Willum Þór. Veit greinilega ekki að ég æfði fótbolta í mörg ár m Breiðablik, margfaldur Íslandsmeistari og var í U17 landsliðinu. En auðvitað er ekki hægt að tala um fótbolta v kjellingar..? Nenni ekki að tala v rembur..https://t.co/cQaYJ2ySLc
— Rósa Björk B (@RosaBjorkB) September 12, 2019
Þingmenn fá litlu um það ráðið hvar þeir sitja. Samkvæmt vef Alþingis fer drátturinn fram með eftirfarandi hætti:
„Hlutað er um sæti þingmanna, annarra en ráðherra, í upphafi hvers þings. Hver þingmaður fær sæti í þingsalnum í samræmi við þá tölu sem er á kúlu sem hann dregur.“
Fólk á Alþingi er ekki alltaf vinir. Um það þarf ekki að hafa mörg orð en skemmst er að minnast Klausturmálsins sem setti allt í háaloft á Alþingi. Ekki skal fullyrt hvort um heppni eða örlög sé að ræða í tilfelli Miðflokksmannanna Sigmundar Davíðs Gunnlaugssonar og Gunnars Braga Sveinssonar, en þeir eru sessunautar. Gunnar Bragi fær aftur svokallað endasæti, er aðeins með sessunaut á vinstri hönd.
Helstu þolendur Klausturmálsins virðast sleppa við að sitja við hlið gerenda og þá er nokkuð langur vegur á milli þeirra Björns Leví Gunnarssonar, Pírata og Ásmundar Friðrikssonar, Sjálfstæðismanns, ekki ósvipað og í akstursgreiðslumálinu, en aðeins tvö sæti voru á milli þeirra á síðasta þingi.
Þá er fyrrverandi dómsmálaráðherra, Sigríður Á. Andersen komin út í sal og skiptir við Áslaugu Örnu Sigurbjörnsdóttur, en Sigríður fær samherjann Harald Benediktsson sér á hægri hönd.
Þá er Jón Gunnarsson, Sjálfstæðisflokki, við hlið Andrésar Inga Jónssonar, þingmanns VG, en hvorugur þeirra styður stjórnarsamstarfið af heilum hug og ættu því að hafa margt til að ræða um. Hver veit nema sú sætaskipan hafi sögulegar afleiðingar.
Hér að neðan má sjá sætaskipan Alþingis og fyrir neðan er sætaskipanin frá yfirstöðnu 149. þingi, til samanburðar.
Hér fyrir neðan er sætaskipanin frá 149. þingi
