Falsfréttir á Facebook eru orðnar að daglegu fyrirbæri. Þar eru nöfn þekkts fólks notuð til að auglýsa einhverja vöru eða þjónustu en auglýsingin sett í fréttabúning. Flestir sjá í gegnum slíkar tilraunir, en alltaf eru einhverjir sem láta glepjast.

Eyjan hefur áður fjallað um slík mál, til dæmis þegar Björgólfur Guðmundsson og Einar Þorsteinsson voru notaðir til að lofa Bitcoin.

Sjá nánar: Björgólfur Guðmundsson, Einar Þorsteinsson og Viðskiptablaðið fórnarlömb falsfrétta um ágæti Bitcoin

Nú hefur nafn Vigdísar Hauksdóttur, oddvita Miðflokksins í Reykjavík, verið notað í slíka falsfrétt á Facebook og varar Vigdís fólk við henni í dag:

„Bara láta ykkur vita að þetta er „falsfrétt“ – fékk ábendingu um þetta frá facebook vini Hér er verið að nota nafnið mitt og í raun mig sjálfa í að ljúga að fólki. Passið ykkur á þessum delum sem að þessu standa …!!!“