Á þingi CITES í Genf á sunnudag var kosið um hvort vernda ætti 18 hákarlategundir í útrýmingarhættu. Ísland kaus gegn tillögunni og skipaði sér í flokk með þjóðum á borð við Kína, Japan, Malasíu og Nýja-Sjáland, sem allar kusu gegn verndun einnig. Fréttablaðið greinir frá.
Washington sáttmálinn (CITES) er alþjóðlegur samningur er varðar verslun með dýr í útrýmingarhættu, en nokkur ofveiði hefur verið á hákarlategundum og því þótti nauðsynlegt að kjósa um málið. Kosið var um þrjár tillögur og allar voru samþykktar, en 2/3 atkvæða þarf til að tillaga sé samþykkt. Engin af hákarlategundunum 18 sem kosið var um býr við Íslandsstrendur.
Samkvæmt Jóni Má Halldórssyni kemur kosningin ekki á óvart, en hákarlaveiði sé lítil við Ísland og ekki stórar upphæðir um að ræða. Mikið af aflanum sé meðalafli. Fimm tegundir eru veiddar hér við land, þeirra þekktastur er líklega Grænlandshákarlinn, sem Íslendingar borða á þorrablótum og mana útlendinga til að borða :
„Íslendingar hafa verið mjög tregir að samþykkja vernd á fiskum. Við erum fiskveiðiþjóð og það eru stærri hagsmunir sem liggja í öðrum tegundum. Erlendis hafa samtök barist fyrir því að takmarka veiðar á þorski svo dæmi sé tekið. Ofveiði á hákörlum hefur verið gríðarleg, sérstaklega í Indlandshafi og Kyrrahafi. Því er full ástæða til þess að fara í alvarlegar verndaraðgerðir fyrir þessi dýr,“
sagði Jón við Fréttablaðið.
