Lögmaðurinn Sveinn Andri Sveinsson, sem skipaður var skiptastjóri þrotabús WOW air, mun ekki víkja úr starfinu, líkt og Arion banki hefur farið fram á. Þetta kemur fram í skriflegu svari Símonar Sigvaldasonar, dómsstjóra Héraðsdóms Reykjavíkur við fyrirspurn RÚV.

Stjórnendur Arion banka töldu Svein Andra vanhæfan en fundað var um málið í gær þar sem ekki tókst að miðla málum. Mannlíf segir frá því í dag að meint vanhæfi Sveins Andra sé vegna ágreinings Arion banka við Svein Andra í máli, en Sveinn Andri er einnig skiptastjóri í þrotabúi Data Cell, sem Arion banki hefur gert kröfu til.

Arion banki er einn stærsti kröfuhafinn í þrotabú WOW air.

Samkvæmt upplýsingafulltrúa Arion banka mun bankinn fara fram á úrskurð Héraðsdóms Reykjavíkur um stöðu Sveins Andra.

Valið á skiptastjórum í þrotabú hefur verið gagnrýnt af mörgum, þar sem engir verkferlar eða reglur gildi um hvernig sé staðið að slíku vali, heldur ráði kunningsskapur og klíka því að miklu leyti hverjir hljóti hnossið.

Sjá einnig: Óska eftir að Sveinn Andri verði settur af sem skiptastjóri WOW air vegna vanhæfni