Erna Ýr Öldudóttir, blaðamaður á vefritinu Viljinn, er óánægð með að Blaðamannafélag Íslands hafi ekki fjallað um atvik er varð um síðustu helgi, er Snæbjörn Brynjarsson, varaþingmaður Pírata, veittist að henni á skemmtistað. Snæbjörn lýsti yfir fyrirlitningu sinni á Ernu fyrir það að hún starfaði á Viljanum, þar sem varaþingmaðurinn fyrrverandi virðist hafa horn í síðu eiganda miðilsins, Björns Inga Hrafnssonar. Einnig staðhæfir hún að Snæbjörn hafi hótað sér ofbeldi en hann neitar því. Segir Erna að hún hafi upplifað að sér væri ógnað.

Fjallað var um málið í Fréttablaðinu á mánudaginn og nokkrum vefmiðlum. Snæbjörn sagði af sér varaþingmennsku um leið og málið kom upp.

Erna Ýr skrifar á Facebook-síðu sína í dag:

„Blaðamannafélag Íslands, sem ég er greiðandi meðlimur í, hefur enn ekki fjallað um málið eða haft samband við mig, eftir að varaþingmaður Pírata, sem sat seinast á Alþingi í desember, ógnaði mér vegna starfs míns. Fáir fjölmiðlar hafa fjallað um málið eða haft samband við mig, en ýmsir eru tilbúnir að leyfa ofstopamanninum að „grenja sig hvítan aftur“ með hjartnæmum fréttum af „afsögn“ hans, iðrun og yfirbót.“

Andrés Magnússon, blaðamaður á Viðskiptablaðinu, skrifar fjölmiðlapistil um um málið í Viðskiptablaðið í morgun þar sem segir óskiljanlegt að Blaðamannafélag Íslands hafi ekki fjallað um málið.