Í nýrri fjármálaáætlun ríkisstjórnarinnar er gert ráð fyrir að hefja gjaldtöku af ferðamönnum í upphafi árs 2020. Eru þær tekjur áætlaðar um 2.5 milljarðar króna á ári. Bjarni Benediktsson fjármálaráðherra, sagði í fréttum RÚV að útfærslan á gjaldtökunni lægi ekki fyrir, en nýta ætti tímann vel til að ákveða hvaða kerfi yrði viðhaft.

Á vef Túrista.is er bent á að fjárlög þessa árs geri ráð fyrir að gistináttagjaldið skili hinu opinbera um 1.5 milljarði, en það var þrefaldað í fyrra. Samkvæmt stjórnarsáttmálanum er nefnt að tekjur af gistináttaskatti renni til sveitafélaga.

Bjarni Benediktsson hefur því mælt fyrir þremur mismunandi álögum á ferðaþjónustu, ýmist sem fjármála- eða forsætisráðherra. Fyrst var náttúrupassinn kynntur til sögunnar og á síðasta ári var lagt til að ferðaþjónustan yrði færð í efra þrep virðisaukaskatts. Hvorug tillagan náði fram að ganga og er sérstaklega tekið fram í stjórnarsáttmálanum að áform um hækkun virðisaukaskatts á ferðaþjónustu verði lögð til hliðar, meðan aðrar leiðir verði kannaðar, til dæmis með álagningu  komu- eða brottfarargjalds.

Í texta náttúrupassafrumvarpsins sem lagt var fram árið 2014 af Ragnheiði Elínu Árnadóttur, þáverandi ferðamálaráðherra, var ókosturinn við sérstakt komu- og brottfarargjald sagður að ekki væri hægt að gera undanþágu varðandi innanlandsflug vegna reglna EES sem giltu á svæðinu. Þá var skatturinn sagður skila sér út í verðlagið leiða til minni eftirspurnar, sérstaklega í innanlandsflugi.

Um 2.8 milljörðum verður varið til uppbyggingar á innviðum fjölsóttra staða  í náttúru Íslands samkvæmt fjármálaáætluninni, en heildarútgjöld til ferðaþjónustu mun þó lækka úr 2.2 milljörðum í 1.6 milljarð á næstu fimm árum.