Eins og sjá má á myndunum hér neðst, sem voru teknar á páskahelginni, er búið að rífa Nasa-salinn svokallaða. Það var ekki lengi gert. Þetta var viðbygging við gamla Kvennaskólann sem er verndaður í bak og fyrir. Gamla húsið er frá 1878 en salurinn var byggður á stríðsárunum, 1942.

Sem gömlum Reykvíkingi hefur mér alltaf þótt dálítið hvimleitt þegar talað er um Nasa. Það er skemmtistaðurinn sem var þar síðast, þar var oft fjör og örugglega margar góðar minningar. Staðurinn þótti góður til tónleikahalds. En nafnið er rislítið – passar ágætlega á bandarísku geimferðastofnunina en síður á veitingahús í miðbæ Reykjavíkur.

Þarna var lengi Sjálfstæðishúsið og haldnar samkomur og veislur hjá flokknum sem lét reisa viðbygginguna, en síðar var þarna skemmtistaður sem kallaðist Sigtún. Sigtún fluttist svo í ógurlega stóra byggingu við Suðurlandsbraut þar sem gátu verið þúsund manns á balli, en þá var í byggingunni mötuneyti Landsímans.

Rifja má upp að Sigmundur Davíð Gunnlaugsson, þá forsætisráðherra, lét friðlýsa salinn 2014. Það var eftir deilur sem gengu meðal annars út á það hvort húsnæðið væri ónýtt.

Nú stendur til að byggja eftirlíkingu af salnum. Hún á að vera að hluta til neðanjarðar og uppfylla reglur um hljóðvist sem sagt er að ekki hafi verið hægt í gamla húsnæðinu. Vonandi eru það einhverjar sárabætur, það er ekki um auðugan garð að gresja þar sem eru staðir fyrir smærri lifandi tónlistarviðburði í Reykjavík.