Ragnar Þór Ingólfsson, formaður VR, er ekki allskostar sáttur við að Fjármálaeftirlitið hafi metið Ármann Þorvaldsson, forstjóra Kviku banka, hæfan til að stjórna bankanum, þrátt fyrir að félag í hans eigu hafi farið á hausinn í 5,7 milljarðar gjaldþroti líkt og Eyjan greindi frá.
Í fréttum Stöðvar 2 í gærkvöldi var greint frá því að Ármann hafi verið metinn hæfur til að stjórna Kviku banka af Fjármálaeftirlitinu og stjórn bankans þrátt fyrir gjaldþrot félags í eigu Ármanns, Ármann Þorvaldsson ehf., en aðeins 152 milljónir fengust upp í lýstar kröfur. Félagið var úrskurðað gjaldþrota árið 2011.
Í lögum um fjármálafyrirtæki segir að stjórnendur megi ekki hafa verið úrskurðaðir persónulega gjaldþrota á síðustu fimm árum, hlotið dóm fyrir refsiverðan verknað á síðustu 10 ár og tekið er fram að þeir verði að hafa „gott orðspor“.
Ragnar Þór segir að ekki sé hægt að skálda upp slíkan „skít“:
„Í fréttum er þetta helst. Hvítþvottur um endurreisn fjármálakerfisins telur að almenningur eigi að fá heimild til að nota séreignasparnað til fjárfestinga í hlutabréfum og að lífeyrissjóðir verði að koma fjármunum almennings fyrir í verðbréfasjóðum „í umsýslu fjármálakerfisins“ til að koma í veg fyrir „óeðlileg“ afskipti sjóðanna. Fjármálaeftirlitið telur ekkert athugavert við milljarða gjaldþrota ferilskrá forstjóra Kviku. Allt í nafni þess að endurvekja traust almennings á fjármálakerfinu. You Can’t Make This Shit Up!!“
Fjármálaeftirlitið hefur metið 10 einstaklinga óhæfa til að gegna stjórnunarstöðum síðastliðin fimm ár. Ármann var einn af þeim lykilstarfsmönnum Kaupþings sem fékk há lán til þess að kaupa hlutabréf í bankanum. Ármann færði síðan hlutabréf sín og lán yfir í áðurnefnt félag í byrjun árs 2007 sem kom í veg fyrir að hann yrði persónulega gjaldþrota í kjölfar bankahrunsins.