Neytendasamtökin: Flugmiðar hækka umtalsvert

Flugmiðaverð til fjögurra algengra áfangastaða WOW og Icelandair hækkaði að meðaltali um 35 prósent á tímabilinu 5. nóvember til 14. desember síðastliðinn, samkvæmt könnun Neytendasamtakanna. Hækkunin hjá WOW nam 65 prósentum en 19 prósentum hjá Icelandair.

Í tilkynningunni segir:

„Neytendasamtökin fylgjast grannt með þróun á flugmiðaverði nú þegar miklar sviptingar eru á flugmarkaði. Afar erfitt er að bera saman verð á flugferðum frá einum tíma til annars, annars vegar vegna þess að verð breytist afar hratt og hins vegar vegna þess að illgerlegt er að bera saman samskonar flug. Þar kemur til mismunandi framboð og eftirspurn eftir tímabilum, eldsneytisverð, gengisbreytingar, mismunandi þjónusta og farangursheimildir og margt fleira.

Að þessum fyrirvörum gerðum er áhugavert að skoða verðþróun undanfarnar vikur. Tekin voru skjáskot af flugmiðaverði til fjögurra algengra áfangastaða Wow og Icelandair, annars vegar 5. nóvember, eða daginn sem tilkynnt var um mögulegan samruna félaganna og hins vegar 14. desember. Í báðum tilfellum var skoðað lægsta mögulega verð fram og til baka, eins og það birtist á vefnum, óháð farangri, fyrir vikulanga dvöl sem hæfist nákvæmlega mánuði síðar. Verð til þessara fjögurra áfangastaða hækkaði um 35% að meðaltali á tímabilinu, Wow um 65% og Icelandair um 19%. Mest hækkaði verð á flugleiðinni til Parísar, eða um 266% hjá Wow og 32% hjá Icelandair. Þá lækka bæði Wow og Icelandair verð á flugleiðinni til London.“