„Ég vil geta gert eitthvað annað en að ströggla við að vinna og hafa áhyggjur af því hvort endar ná saman eða ekki,“ segir Hjördís Bech Ásgeirsdóttir, en hún er ein þeirra Íslendinga sem þurfa að sjá fyrir sér á lægstu launum – lífsbaráttan er hörð.
„Þannig á lífið ekki að vera,“ segir Hjördís en hún á sex barnabörn og vill geta veitt þeim eitthvað, til dæmis boðið þeim í leikhús. Öll fjölskyldan vinnur hörðum höndum en ber lítið úr býtum.
„Ég á stóra fjölskyldu, þau eru öll að vinna mikið, það er ekkert annað í boði á þessu landi,“ segir Hjördís. Hún hefur gert sitt besta til að aðstoða börnin sín í lífsbaráttunni.
Þetta kemur fram í kynningarmyndbandi frá Eflingu þar sem Hjördís er í stuttu viðtali. Í texta frá Eflingu með myndbandinu segir:
„Verkafólk á Íslandi hefur staðið of lengi á jaðri samfélagsins. Það er kominn tími til að rödd verkafólks heyrist og líf þess og kjör verði öllum kunn. Í kjölfar verkefnisins FÓLKIÐ Í EFLINGU þar sem verkafólk segir sína sögu stígum við nýtt skref í sömu átt. Herferðin LÍF Á LÆGSTU LAUNUM dregur fram raunverulegar aðstæður fólks sem býr við þann „ómöguleika“ að lifa af lægstu launum og lykilstaðreyndir um kjör og skattbyrði launafólks.“
Myndbandið má sjá í spilaranum hér að neðan:
