Guðmundur Gunnarsson, bæjarstjóri Ísafjarðar, sakar Óttar Yngvason, lögmann Náttúruverndarsamtakanna um rasisma í viðtali í Kastljósi í gær. Óttar ræddi um fiskeldi á Vestfjörðum og boðaðar lagabreytingar í kjölfar ákvörðunar Úrskurðarnefndar um umhverfis- og auðlindamál um að fella úr gildi leyfi tveggja fiskeldisfyrirtækja á svæðinu. Íbúi á Bíldudal sem Eyjan ræddi við í gær sagði að margir á svæðinu væru með hnút í maganum vegna óvissunnar um hvort fiskeldisfyrirtækin færu burt eða ekki.
Sjá einnig: Uppnám meðal íbúa á Bíldudal
Líkt og Eyjan greindi frá í morgun er Guðmundur allt annað en sáttur við framgöngu Óttars í þættinum og segir hann hafa slegið Vestfirðinga með „svellkaldri rasistatusku“ í andlitið. Guðmundur segir að Óttar hafi farið fram með rangfærslur og rasisma í málflutningi sínum þegar hann talaði gegn sjókvíaeldi á Vestfjörðum.
Sjá einnig: Bæjarstjóri Ísafjarðarbæjar segir lögmann hafa slegið Vestfirðinga með „svellkaldri rasistatusku“
Hér fyrir neðan má sjá hvað Óttar Yngvason sagði varðandi atvinnu á svæðinu í Kastljósþættinum í gær er hann ræddi við Einar Þorsteinsson fréttamann. Lesendur geta svo lagt mat á hvort um sé að ræða „svellkaldra rasistatusku“ eða ekki.
Einar spurði hann hvort það væri ekki rétt að gæta meðalhófs þar sem fólk byggi afkomu sína á þessum fyrirtækjum.
Óttar: „Þetta eru örfáir menn sem eru þarna við störf. Og mest er það nú Pólverjar eða útlendingar.“
Einar skaut þá inn: „Þeir þurfa nú líka að vinna.“
„Já já. Þeir geta unnið líka víðar. Og þarna eiga þeir ekki nema bara bráðabirgðaheimili.“
Einar sagði þá: „Það er nú kannski ekki alveg hægt að segja það.“
Atvinnumálin bar aftur á góma stuttu síðar, spurði Einar:
„Hvað finnst þér um þau sjónarmið að þarna sé verið að kippa grundvellinum undan atvinnustarfsemi á þessu svæði?“
„Þessi atvinnustarfsemi er ný þarna á svæðinu. Þetta eru örfáir aðilar sem að vinna við þetta…“
Einar: „Menn hafa talið þetta upp í 300 störf.“
Óttar: „Það er bara vitleysa. Það eru kannski 10-15 störf þarna í Patreksfirðinum og ekkert byrjað í Tálknafirðinum.“
