Gylfi Hammer Gylfason, settur aðstoðaryfirlögregluþjónn við greiningardeild Ríkislögreglustjóra, segir að erlend ríki stundi njósnir á Íslandi:
„Það er mat GRD [greiningardeildar Ríkislögreglustjóra] að erlend ríki stundi njósnir á Íslandi með svipuðum hætti og í öðrum ríkjum. Njósnastarfsemin hér á landi telst viðvarandi.“
Þetta segir í svari Gylfa við fyrirspurn Morgunblaðsins. Morgunblaðið greinir frá.
Greiningardeildin hefur ekki gefið út sérstakt áhættumat vegna njósnastarfssemi hér á landi, líkt og hún hefur gert varðandi hryðjuverka- og glæpastarfssemi og álags á landamæri.
Gylfi segist ekki gefa upp hvort lögreglan hafi tök á því að sinna málaflokknum, heldur sé það ljóst að lögreglan þurfi „hverju sinni að forgangsraða verkefnum.“
Þá segist Gylfi ekki gefa upp starfsaðferðir lögreglu á þessu sviði.
Greiningardeildin hefur sömu lagaheimildir og lögreglan varðandi slík mál, en tillögur sem lagðar hafa verið fram á Alþingi varðandi forvirkar rannsóknarheimildir hafa ekki komið til umræðu.