Björn Bjarnason, fyrrverandi ráðherra, segir að sósíalískir harðstjórnarhættir ríki nú í stéttarfélaginu Eflingu þar sem hver sá sem ekki dansar á réttu línunni sé látinn fjúka. Björn skrifar á heimasíðu sína:

„Stjórnarháttum Sólveigar Önnu Jónsdóttur formanns og Viðars Þorsteinssonar framkvæmdastjóra er lýst sem harðstjórn. Þau hafa hreinsað þá út úr 50 manna starfsliði Eflingar sem ekki lúta vilja þeirra. Hófust hreinsanirnar þegar Þráinn Hallgrímsson skrifstofustjóri var rekinn fyrirvaralaust á stjórnarfundi og Viðar ráðinn framkvæmdastjóri 27. apríl 2018. Þau Sólveig Anna og Viðar ráku einnig Hörpu Ólafsdóttur hagfræðing.“

Þá greinir Björn frá því að Stefán Ólafsson, prófessor í félagsfræði, hafi verið ráðinn til félagsins. Síðan skrifar Björn:

Nú hefur fjármálastjóra Eflingar og bókara verið ýtt til hliðar eftir að fjármálastjórinn vildi leita umboðs stjórnar til að greiða reikning (1 milljón króna) frá Öldu Lóu Leifsdóttur, eiginkonu Gunnars Smára. Áður hafði Alda Lóa fengið greiddar um 4 milljónir króna úr sjóðum félagsins, segir í Morgunblaðinu. Vinna hennar felst í myndatöku. Má meðal annars sjá myndir af félagsmönnum Eflingar á eigin Facebook-síðu hennar.

Undir loks pistils síns skýtur Björn á Gunnar Smára Egilsson, stofnanda Sósíalistaflokksins og einn helsta stuðningsmann Sólveigar Önnu:

„Um árabil hefur Gunnar Smári notið meiri verndar á fjölmiðlavettvangi en aðrir sem staðið hafa í svipuðum fjármálasviptingum og hann.“