Í netheimum gengur nú falsfrétt frá heraldednews.com, sem nýtir sér útlit Viðskiptablaðsins í „frétt“ um að Björgólfur Guðmundsson, fyrrum stjórnarformaður Landsbankans, hafi grætt 250 milljarða íslenskra króna með Bitcoin rafmyntinni.
Og ekki nóg með það, heldur á hann að hafa sýnt Einari Þorsteinssyni, fréttamanni RÚV, hvernig hægt væri að græða peninga á Bitcoin í beinni útsendingu í Kastljósi.
Ekkert af þessu er hinsvegar satt og til marks um fölsunina er Viðskiptablaðið nefnt Viðskiptabaðið, í „fréttinni.“
Útlit síðunnar er hinsvegar keimlík vefsíðu Viðskiptablaðsins og gætu einhverjar trúgjarnar sálir því látið blekkjast. Orðalag textans er að vísu einkennilegt, en þó það málfræðilega „rétt“ að ekki er einungis hægt að kenna Google translate um óskapnaðinn.
Í samtali við Eyjuna sagðist Einar Þorsteinsson, fréttamaður RÚV, harma slíkar falsfréttir, sem gerðu lítið annað en að afvegaleiða umræðuna:
„Ég er alveg bit yfir þessu.“