Í fjárlögum ársins 2019 sem kynnt voru í gær er kafli sem ber heitið „Launaforsendur“ þar sem áætluð er prósentutala þeirra launahækkana sem kjarasamningar við ríkisstarfsmenn skili í kaupmáttaraukningu.
Samkvæmt frumvarpinu er gert ráð fyrir að samningar við ríkistarfsmenn skili 0.5 prósent kaupmáttaraukningu, sem þýðir launahækkun upp á 3,4 prósent.
Vilhjálmur Birgisson, formaður Verkalýðsfélags Akraness, vitnar í fjárlögin á Facebooksíðu sinni og vekur athygli á þessari prósentuhækkun, sem er honum ekki að skapi, en hann ber hækkunina saman við úrskurð kjararáðs um launahækkun æðstu ráðamenn ríkisins:
„Eins og flestir vita þá eru kjarasamningar opinbera starfsmanna sem starfa hjá ríkinu lausir 1. apríl á næsta ári. En orðrétt segir í fjárlagafrumvarpinu um launahækkanir til handa starfsmönnum sem starfa hjá ríkinu: „Í ljósi þessa og einnig því að hægt hefur á hagkerfinu er í frumvarpinu gengið út frá því að samningar ríkisstarfsmanna skili 0,5% kaupmáttaraukningu sem svarar til 3,4% launahækkunar.“ Já þá liggur það fyrir að opinberir starfsmenn sem starfa hjá ríkinu eiga von á 3,4% launahækkun sem er „örlítið minna“ en kjararáð lét æðstu ráðmenn ríkisins fá sem var eins og allir muna 45%“
Vilhjálmur vitnar í kaflann um launaforsendur í fjárlögum þar sem reiknuð eru inn áhrif af spá um launahækkanir á árinu 2019, þar sem stuðst er við mat Kjara- og mannauðssýslu ríkisins á fyrirliggjandi kjarasamningum um launahækkanir fyrir stéttarfélög starfsmanna ríkisins. Samkvæmt fjárlögunum er með þessum forsendum verið að sýna varfærni og stuðlað að jafnvægi í efnahagslífinu:
„Nær allir kjarasamningar ríkisstarfsmanna eru lausir frá og með 1. apríl á næsta ári. Sama á við um samninga á almennum markaði, en samningar t.d. ASÍ-félaga eru lausir frá áramótum. Það er því ljóst að umsvif nýrra kjarasamninga sem taka gildi á næsta ári ná til nær allra launþega í landinu. Í ljósi þessa og einnig því að hægt hefur á hagkerfinu er í frumvarpinu gengið út frá því að samningar ríkisstarfsmanna skili 0,5% kaupmáttaraukningu sem svarar til 3,4% launahækkunar. Með þessum forsendum er gætt varfærni og reynt að stuðla að því að efnahagslífið haldi jafnvægi. Það er í samræmi við þá stefnumörkun í opinberum fjármálum sem fram kemur í lögum um opinber fjármál. Miðað er við að kjarasamningarnir taki gildi 1. apríl 2019 og með tilliti til þess nemur vegin meðallaunahækkun ársins 2019 3,1%.“