Þegar litið er til tólf stærstu sveitarfélaganna á Íslandi, má sjá að Framsóknarflokkurinn situr í flestum meirihlutum, eða sjö talsins. Framsóknarmenn, sem ýmist eru frjálsir eða óháðir, eru í meirihluta í Kópavogi, Hafnarfirði, Akranesi, Fjarðabyggð, Reykjanesbæ, Akureyri og Árborg.
Samfylkingin er í fimm meirihlutum. Reykjavík, Akranesi, Akureyri, Reykjanesbæ, og Árborg.
Sjálfstæðisflokkurinn er einnig í fimm meirihlutum, Garðabæ, Seltjarnarnesi, Hafnarfirði, Kópavogi og Mosfellsbæ.
Vinstri grænir eru í Reykjavík og Mosfellsbæ.
Píratar, Viðreisn og Miðflokkur eru allir í einum meirihluta, þeir fyrstnefndu í Reykjavík og Miðflokkur í Árborg.
Tvö bæjarfélög eru með hreinan meirihluta, Garðabær og Seltjarnarnes, þar sem Sjálfstæðisflokkurinn er stærstur.
Þrjár konur eru bæjarstjórar af tólf stærstu bæjarfélögunum.
Þær gætu orðið sex, líkt og karlkyns bæjarstjórarnir eru nú, en eftir er að ráða bæjarstjóra í þremur sveitarfélögum, Akureyri, Árborg og Fjarðabyggð.
„Það er ekkert nýtt sem stendur upp úr í nýliðnum sveitarstjórnarkosningum en ef hægt er að tala um einhverja sigurvegara þá virðist Framsókn halda merkilega vel velli og vera sterk í meirihlutum í stærstu sveitarfélögunum að Reykjavík undanskilinni. Þetta gerist þrátt fyrir að Framsókn sé að glíma við Miðflokkinn sem má vel við una eftir kosningar. Auk þess náði Viðreisn að koma sér á blað í sveitarstjórnarpólitíkinni,“
segir Grétar Eyþórsson stjórnmálaprófessor við Morgunblaðið. Hann tekur fram að það hljóti að vera vonbrigði fyrir Sjálfstæðisflokkinn að komast ekki í meirihluta í Reykjavík, þrátt fyrir fylgisaukningu. Auk þess sé fylgistap í Reykjanesbæ og klofningur í Vestmannaeyjum.