Frumvarp um bann við umskurði drengja hér á landi hefur vakið athygli út fyrir landsteinana. Silja Dögg Gunnarsdóttir, þingmaður Framsóknarflokksins lagði fram frumvarpið ásamt þingmönnum VG, Pírata og Flokks fólksins sem miðar að breytingu á almennum hegningarlögum þess efnis að líkamsárás sem valdi tjóni á líkama eða heilsu barns eða konu, með því að fjarlægja kynfæri að hluta til eða öllu leyti, varði allt að sex ára fangelsi. Bann við umskurði stúlkna og kvenna var fest í lög árið 2005.
Samkvæmt greinargerð hefur umskurður drengja viðgengist í um 5000 ár, í krafti trúarbragða, aðallega gyðinga og múslima. Frumvarpið hefur þegar vakið athygli gyðinga, sem vilja að barist sé gegn frumvarpinu með því að beita alþjóðlegum þrýstingi.
Samkvæmt upplýsingum frá Embætti landlæknis við fyrirspurn Eyjunnar, hafa samtals 14 drengir gengist undir umskurð frá árinu 2006. Aðeins ein slík aðgerð hefur verið framkvæmd á heilbrigðisstofnun frá árinu 2006, en 13 slíkar aðgerðir á drengjum undir 18 ára aldri eru skráðar hjá sjálfstætt starfandi sérfræðingum á árunum 2010-2016 og einhverjar til viðbótar á fullorðnum einstaklingum. Ekki er skilgreint hvort aðgerðirnar séu trúarlegs- eða læknisfræðilegs eðlis.
Landlæknisembættið fær ekki gögn frá lýtalæknum og því er möguleiki á að fleiri aðgerðir hafi verið gerðar þar. Engin af þeim lýtalækningastofum sem Eyjan hafði samband við, kannaðist þó við að hafa framkvæmt slíkar aðgerðir.
