Steingrímur J. Sigfússon, forseti Alþingis, er staddur í Kína ásamt tveimur starfsmönnum Alþingis. Steingrímur mun þar hitta fyrir forseta þjóðþinga Norðurlandanna og Eystrasaltsríkjanna, en heimsókninni lýkur þann 13. janúar.
Mun Steingrímur hitta kollega sinn í kínverska þinginu, Zhang Dejiang ásamt formanni utanríkismálanefndar, Ying Fu auk annarra háttsettra stjórnmálamanna. Þá verður borgin Chengdu heimsótt og tekið hús á leiðtogum hinna sex héraðstjórna þar, en Tíbet er eitt þeirra héraða.
Hápunktur ferðarinnar verður eflaust þegar sendinefndin hittir unga frumkvöðla á sviði nýsköpunar, enda mikil gerjun sem á sér stað í Kína í krafti hagvaxtar.
Hugsanlega gefst nú Steingrími J. tækifæri á að launa Ólafi Ragnari Grímssyni lambið gráa, en gaman er að rifja upp gamla sögu af þeim tveim sem einmitt tengist hinu stóra alþýðulýðveldi og nýsköpun, sem þá var og hét.
Í frétt Tímans frá 4. október 1994, með fyrirsögninni „Hrifnir af tæknikúnstum Kínverja“, er sagt frá því þegar Steingrímur heitinn Hermannsson, þáverandi Seðlabankastjóri og Ólafur Ragnar Grímsson, þáverandi formaður Alþýðubandalagsins, fóru saman til Kína í boði þarlendra stjórnvalda. Þá fengu þeir félagar að prófa nýtt tækniundur þess tíma, sem nefndust „farsímar“.
Samkvæmt fréttinni voru þeir félagar svo hrifnir af þessum tæknikúnstum kínverjanna, að þeir brugðu á það ráð að hringja í Steingrím J. Sigfússon, þáverandi varaformann Alþýðubandalagsins, úr hótelherbergi sínu í Peking, til að skýra honum frá þessum „móbæl telefons.“ Steingrímur J. var þó ekki par hrifinn af þessu uppátæki, þar sem hringingin barst honum um miðja nótt og hann steinsofandi, en þá var dagur í Kína. Honum rann þó fljótt reiðin þegar hann heyrði hverjir væru á hinum endanum.
„Þetta var ákaflega skemmtilegt símtal. Þeir töluðu við mig báðir og voru afar upp með sér af þessu öllu sem þeir voru að upplifa þarna. Ég spjallaði við þá sagði þeim að fréttir að heiman og svo var það ekkert meira,“
sagði Steingrímur J. við Tímann.
Hver veit nema Ólafur Ragnar fái óvænta hringingu á næstunni…
