Smári McCarthy þingmaður Pírata segir að ummæli sín um breska sjónvarpsmanninn og kynferðisbrotamanninn Jimmy Savile og stjórnarslitin hafi verið vísvitandi rangtúlkuð til að láta það hljóma eins og Smári hafi verið að líkja Bjarna Benediktssyni forsætisráðherra við barnaníðinginn alræmda. Segir Smári að þetta hafi ófullkomin samlíking. Líkt og Eyjan greindi frá um helgina þá olli tíst Smára mikilli reiði meðal stuðningsmanna Sjálfstæðisflokksins og fleiri, hafa bæði Björn Bjarnason fyrrverandi ráðherra og Hannes Hólmsteinn Gissurarson stjórnmálafræðiprófessor lýst yfir vanþóknun sinni á tísti Smára.

Iceland’s Jimmy Savile case: our PM, who was in the Panama Papers, has hid for two months his father’s support for a pedophile’s clemency.

— Smári McCarthy (@smarimc) September 14, 2017

Sjá einnig: Erlendir fjölmiðlar slá falli stjórnarinnar upp sem máli tengdu hneyksli vegna barnaníðs

Sjá einnig: Spjótin standa á Smára McCarthy: „Níðingur“ sem eigi ekkert erindi á Alþingi

Smári segir í færslu á Fésbók í dag að heiðarleiki og sanngirni sé hans hjartans mál:

Nú er ansi ógeðfeld orðræða komin í gang, þar sem tíst mitt frá því á fimmtudaginn sl. er mjög vísvitandi rangtúlkað á þann hátt að ég sé að væna Bjarna Benediktsson um einhvern viðbjóð. Slíkt myndi ég aldrei gera. Ef það hefði verið meiningin mín þá hefði ég bara sagt það. Þeir sem þekkja mig vita að ég tala ekki undir rós um svona lagað,

segir Smári. Hann hafi verið að lýsa ástandi sem kom honum fyrir sjónir, hugrenningartengsl um yfirhylmingu háttsettra aðila í samfélaginu við mjög ógeðfellt mál:

Því meira sem kemur í ljós um atburðarásina, því betri verður samlíkingin. En vissulega var þetta ófullkomin samlíking, eins og allar samlíkingar eru, og ég skal viðurkenna að þetta var stuðandi. Hins vegar kemur það úr ansi harðri átt að valinkunnir menn séu farnir að klína álitshnekki Íslands á erlendri grundu á mig. Þeir mega eiga þennan skít sem gerðu hann.

Stjórnin er hrunin, og slíkt fréttist út um allan heim, sama hvort ég tali um þetta eða ekki.