Uppreisn, ungliðahreyfing Viðreisnar, hefur sent frá sér ályktun um aðskilnað ríkis og kirkju og kallar eftir því að Alþingi hefji strax vinnu við aðskilnaðinn.

 
Ályktunin er svohljóðandi:

Aðskiljum ríki og kirkju!

Stjórn Uppreisnar fagnar ræðu Jóns Steindórs Valdimarssonar, þingmanns

Viðreisnar, þar sem hann sagði löngu tímabært að Alþingi verði við

kröfunni um aðskilnað ríkis og kirkju. Stjórn Uppreisnar tekur einnig

undir með honum um að mikilvægt sé að aðskilnaður gangi í gegn með sátt

allra aðila og að umræðan verði tekin án þess að fólk skýli sér á bak við

það hversu flókinn aðskilnaður kunni að vera. Stjórn Uppreisnar hefur þá

bjargföstu trú að aðskilnaður verði öllum til heilla, bæði þjóðkirkjunni

og þjóðinni allri.

Í samkomulagi ríkisins og þjóðkirkjunnar um kirkjujarðir og launagreiðslur

presta og starfsmanna þjóðkirkjunnar frá 10. janúar 1997 kemur fram að

kirkjujarðir og kirkjueignir sem þeim fylgja, að frátöldum prestsetrum,

verði eign ríkisins. Í samkomulaginu kemur jafnframt fram að aðilar líti á

það sem eignaafhendingu og skuldbindingu sem fullnaðaruppgjör þeirra vegna

þeirra verðmæta sem ríkissjóður tók við árið 1907 gegn því að ríkissjóður

greiði laun biskups, og tiltekins fjölda presta, prófasta og starfsmanna

biskupsembættisins. Launagreiðslur samkvæmt samkomulaginu voru

ótímabundnar en heimild veitt til endurskoðunar þeirra 15 árum frá

undirritun, sem var þá í janúar 2012. Sú endurskoðun hefur ekki enn átt

sér stað.

Með úrskurði kjararáðs, 17. desember sl., var tekin ákvörðun um hækkun

launa biskups um rúmar 250.000 kr. á mánuði, sem skuli gilda afturvirkt

frá 1. janúar 2017. Laun biskups og annarra starfsmanna sem undir

samkomulagið heyra hafa hækkað mikið á samningstímanum. Stjórn Uppreisnar

telur fjárútlát vegna samkomulagsins vera birtingarmynd slæmrar

forgangsröðunar í ríkisrekstri og að umræddum fjármunum væri betur varið í

uppbyggingu grunnþjónustu en laun starfsmanna þjóðkirkjunnar. Að mati

stjórnar Uppreisnar ætti Alþingi að hefja strax endurskoðun samkomulagsins

með það að markmiði að slíta sambandi ríkisins og kirkjunnar. Samfélag sem

trúir á trúfrelsi borgaranna á ekki að upphefja eitt trúfélag á kostnað

skattgreiðenda, óháð fjölda félagsmanna þess.

Í ljósi orðalags samkomulagsins telur stjórn Uppreisnar að kirkjujarðirnar

teljist eign íslensku þjóðarinnar í dag. Mat þarf að fara fram á verðmæti

kirkjujarðanna og vel getur verið að fullt verð hafi þegar verið greitt

fyrir þær á síðustu 20 árum. Ef svo er ekki eru sterk rök fyrir því að

eftirstöðvar verðmætis þeirra verði greiddar. Sú greiðsla myndi forða því

að ríkið yrði skuldbundið til að greiða síhækkandi fjárhæðir á hverju ári

um óákveðna tíð. Það þarf að skoða og þurfa allir aðilar að koma að

borðinu við matið, til að stuðla að því að sátt verði um aðskilnað.

Stjórn Uppreisnar telur að aðskilnaður ríkis og kirkju verði samfélaginu

til heilla. Hver og einn einstaklingur á að hafa rétt til að tilheyra því

trúfélagi sem hún, hann eða hán kýs, án þess að greiða fyrir trúþjónustu

annarra í formi skattgreiðslna. Engin sterk rök eru fyrir því að eitt

trúfélög standi öðrum framar og hljóti sérstaka vernd, líkt og kveðið er

um í Stjórnarskrá, og rímar það illa við þá hugsjón um jafnrétti og jafna

virðingu fyrir öllum, sem við viljum stuðla og hlúa að.