Eftir að ráðherraskipan nýrrar ríkisstjórnar lá fyrir, var ljóst að Páll Magnússon, fyrsti þingmaður Suðurkjördæmis fyrir Sjálfstæðisflokkinn, væri ósáttur við sitt hlutskipti að verða af ráðherrasæti í annað skipti á árinu. Sagðist hann hafa mótmælt þessu við Bjarna Benediktsson og studdi ekki ráðherralista formannsins. Hann greiddi hinsvegar atkvæði með stjórnarsáttmálanum og styður ríkisstjórnina.

Sá orðrómur kviknaði í kjölfarið, að Páll hygðist bjóða sig fram til formanns Sjálfstæðisflokksins á næsta landsfundi. Hann nyti mikils stuðnings og hefði verið beittur þrýstingi úr sinni kreðsu um að bjóða formanninum birginn. Páll segist í samtali við Eyjuna ekki ætla í formannsslag:

„Ég get staðfest að það hafa allmargir nefnt þetta við mig, en ég er ekki að íhuga formannsframboð á næsta landsfundi.“

Það hefði verið djarfur leikur hjá Páli að fara gegn formanninum á þessum tímapunkti, þar sem Bjarni Benediktsson er í sterkri stöðu þrátt fyrir mótbyr síðustu mánaða. Gárungar segja hinsvegar að með hverjum deginum sem líði styttist í næsta hneykslismál formannsins og/eða ríkisstjórnarinnar og þá muni gefast tækifæri fyrir Pál að nýju.

Páll nýtur mikillar hylli innan flokksins sem utan, þykir skarpur, sanngjarn og vel máli farinn. Auk þess nýtur hann þeirrar sérstöðu að vera lítt umdeildur meðal almennings, ólíkt núverandi formanni. Þá geta þeir sem eru vel að sér í millilínalestri séð, að Páll útilokar aðeins framboð á næsta landsfundi, en segir ekkert um þann þarnæsta.