Framsóknarflokkurinn hefur slitið stjórnarmyndunarviðræðunum. Frá þessu greinir mbl.is og vísar í heimildir.

Ástæðan mun vera sú að flokkurinn telur meirihlutann of tæpan, eða 32 þingmenn gegn 31.

DV og Eyjan hafa reynt að ná tali af formönnum þeirra flokka sem að viðræðunum hafa staðið en án árangurs. Að sögn mbl.is ber Framsókn ekki traust til Pírata með svo nauman meirihluta á bak við sig.

Greint var frá því í morgun að góður gangur væri í viðræðunum og formenn flokkanna sem að viðræðunum hafa staðið væru hóflega bjartsýnir. Katrín Jakobsdóttir, formaður Vinstri grænna, sagði í gær að framhald viðræðnanna myndi ráðast í dag.

Í frétt RÚV í morgun sagði Þórhildur Sunna Ævarsdóttir, talsmaður Pírata, að hún væri bjartsýn á framhaldið. Logi Einarsson, formaður Samfylkingarinnar, sagðist hóflega bjartsýnn; hann væri ekki í þessum viðræðum nema telja að samstarfið gæti orðið að veruleika.