Sigmundur Davíð Gunnlaugsson forsvarsmaður Miðflokksins segir að gagnrýnin sem hann hafi fengið á sig í kjölfar greinar hans í Fréttablaðið sé aðeins forsmekkurinn af því sem koma skal, þegar Miðflokkurinn muni kynna hvernig gera eigi umbætur á fjármálakerfinu þá fyrst verði allt reynt.

Spjótin hafa staðið á Sigmundi Davíð frá því að hann sagði í grein í Fréttablaðinu í gær að Wintris-málinu væri lokið og að niðurstaðan væri sú að eiginkona hans hafi greitt of mikið í skatta vegna félagsins. Því eru ekki allir sammála og telja að Sigmundur Davíð og eiginkona hans hafi ekki farið eftir lögum og reglum í einu og öllu. Sagði Sigmundur í viðtali við Morgunblaðið í dag að hann ætlaði að leita réttar síns gegn fjölmiðlum.

Segir hann á Fésbók að viðbrögðin við greininni séu merkileg:

Alveg er það merkilegt að þegar er komin opinber og endanleg niðurstaða frá skattayfirvöldum, eftir eins og hálfs árs athugun sem við hjón höfðum frumkvæði að, búið að staðfesta að ekki hafi verið reynt að fela neitt og því engar sektir eða álag, 100% viðurkenning á uppgjörsaðferðinni sem endurskoðendurnir lögðu til og þar með endurgreiðsla skatta og inneign (frádráttur) næstu árin, þá skuli „hinir vanalegu grunuðu“ samt fara hamförum í útúrsnúningum,

segir Sigmundur Davíð og bætir við:

En þetta er ekkert. Bara dálítill forsmekkur. Bíðið bara og sjáið viðbrögðin þegar Miðflokkurinn kynnir tillögur sínar um hvernig við ætlum að klára vinnuna við umbætur á fjármálakerfinu.
Þá fyrst verður ALLT reynt.