Ari Trausti Guðmundsson þingmaður VG í Suðurkjördæmi skrifar:
Eftir að tvær ríkisstjórnir með aðild Sjálfstæðisflokksins hafa sundrast verður að kjósa til Alþingis og leita nýrra leiða við landsstjórnina.
Vinstrihreyfingin – grænt framboð (VG) leggur nú í dóm kjósenda stefnu sem byggir á jöfnuði, jafnrétti, samstöðu, lýðræði, umhverfisvernd og ábyrgu frelsi.
Grunnstef VG í komandi kosningum
Við viljum meiri jöfnuð með réttlátari skattheimtu og breyttri ráðstöfun fjármuna, barnafólki, námsmönnum, öryrkjum, eldri borgurum og láglaunafólki til hagsbóta. Tveir efstu tekjuflokkar Hagstofunnar (af 10) taka við 53% allra launa í landu og tíundi hluti þjóðarinnar á yfir tvo þriðju hluta allar eigna. Með hliðrun í skattlagningu til þeirra sem eru mjög vel aflögu færir má afla fjár til aukins jöfnuðar. Sama gildir um mörg stór fyrirtæki.
Við berjumst fyrir jafnrétti starfsgreina, aldraðra, öryrkja og kynja, óháð búsetu, trú, uppruna, kynhneigð eða þjóðfélagsstöðu og lýsum yfir samstöðu með launafólki, með þeim er þurfa á samfélagsaðstoð að halda, alþýðu manna um allan heim og friðelskandi samfélögum eða hópum. Grænu viðhorfin merkja m.a sjálfbært samfélag þar sem auðlindir eru nýttar með náttúruvernd og hagsæld almennings að leiðarljósi. Um leið köllum við á ábyrgt frelsi sem byggir á mannúð, ábyrgð á náunganum jafnt sem samfélaginu og tillitssömu skoðanafrelsi. Við teljum að endurskoða verði stjórnarskrá, byggða á tillögum sem fyrir liggja.
Við myndun næstu ríkisstjórnar leggur VG stóraukna áherslu á velferð, heilbrigði og menntun.
Stefnumál á Suðurnesjum
Meðal stefnumála VG á Suðurnesjum eru þessi: Endurskoðun starfsleyfa kísilvera í Helguvík – enga mengandi stóriðju. Endurbætur og viðhald vega og gerð hjólreiðabrauta og reiðvega. Greiðari almenningssamgöngur, efling strætó. Heilbrigðisstofnun Suðurnesja: Styttri biðtíma, fleira fagfólk, fæðinga- og bráðaþjónustu. Geðheilbrigðisþjónusta fyrir börn og ungmenni, Uppeldi, menntun og menningu með óskir og þarfir barna og ungs fólks í fyrirrúmi. Húsnæði fyrir alla, efld húsnæðissamvinnufélög. Framlög til hafna á landsvæðinu í samgönguáætlun. Aukið fé til rannsókna, þróunar og nýsköpunar. Gerð framtíðarskipulags friðaðra svæða í tengslum við Reykjanesjarðvang. Samvinnu sveitarfélaganna á Suðurnesjum gegnum sóknaráætlun, uppbyggingarsjóð og svæðisskipulag.
Við í VG viljum mynda ríkisstjórn á grunni félagshyggju og með mannúðarsjónarmið að leiðarljósi. Það getum við gert undir forystu Katrínar Jakobsdóttur, með samstarfi við þá flokka sem unnið geta með hreyfingunni. Framkvæmt í ásættanlegum áföngum það sem almenningur kallar eftir. Hverjum treystir þú?
