„Það er umhugsnarvert þegar fjöldi stjórnmálamanna leggur sig fram um að blekkja almenning með yfirlýsingum sínum um að hægt sé að lækka vexti verulega með því einu að banna verðtryggingu. Þetta er sennilega ein glæfralegasta og vitlausasta hugmynd sem sett hefur verið fram af stjórnmálamönnum hér á landi í seinni tíð.“

Þetta segir Þorsteinn Víglundsson félagsmálaráðherra og oddviti Viðreisnar í Reykjavík norður í grein sem hann skrifar í Fréttablaðið í dag. Segir Þorsteinn að ástæða hárra vaxta hér á landi sé íslenska krónan sem sé lítil og óstöðug mynt:

Bann við verðtryggingu breytir þar ekki engu. Lausnin er að festa gengi krónunnar eða taka upp aðra mynt. Ef ekki er ráðist að rót vandans munum við áfram búa við tvisvar til þrisvar sinnum hærri vexti en nágrannalönd okkar. Verðtryggingin er sjúkdómseinkenni óstöðugleikans hér á landi, ekki orsök, enda er hvergi í nágrannalöndum okkar bannað að verðtryggja lán, það er bara óþarfi.

Vitnar Þorsteinn í niðurstöður starfshóps sem átti að kanna afleiðingar af afnámi verðtryggingar, taldi Seðlabankinn að á tveimur árum myndi kaupmáttur fólks minnka verulega, fasteignaverð lækka um 15 til 20%  og landsframleiðsla dragast saman:

Hér er verið að lýsa efnahagslegum hamförum af mannavöldum yrði þessum hugmyndum hrint í framkvæmt. Ekki er hægt að taka aðvörunum Seðlabankans af neinni léttúð. 20% lækkun fasteignaverðs myndi þurrka út eigið fé þúsunda heimila í fasteignum sínum.. Í raun þarf ekki að eyða frekari orðum í þessa hugmynd, svo galin er hún. Enda varð ekkert úr framkvæmd á stefnu Framsóknarflokksins í þessum efnum.

Beinir Þorsteinn spjótum sínum að Miðflokknum, Framsóknarflokknum og Flokki fólksins, sem og verkalýðsleiðtogunum Vilhjálmi Birgissyni og Ragnari Þór Ingólfssyni:

Enn er þessari hugmynd hins vegar haldið á lofti. Þrír flokkar, Miðflokkurinn, Framsókn og Flokkur fólksins, hafa bann við verðtryggingu á stefnuskrá sinni. Jafnframt hafa formenn tveggja verkalýðsfélaga, VR og Verkalýðsfélag Akraness, haldið þessum hugmyndum mjög á lofti. Í ljósi aðvarana Seðlabankans mætti spyrja þá sem enn tala fyrir þessari leið hvers vegna þeir vilji leiða slíkar efnahagshörmungar yfir þjóðina.