„Eru all­ir bún­ir að gleyma því hvernig látið var þegar „lekið“ var upp­lýs­ing­um um vafa­sam­an mann sem stór hóp­ur stóð op­in­ber­lega þétt með og krafðist að fengi sér­staka og óvenju­lega fyr­ir­greiðslu,“

segir leiðarahöfundur Morgunblaðsins í dag, en þar heldur Davíð Oddsson ritstjóri að öllum líkindum á penna. Vitnar Davíð í bloggfærslu Páls Vilhjálmssonar þar sem talað er um tímasetninguna á lögbanni Glitnis á umfjöllun Stundarinnar um viðskipti Bjarna Benediktssonar formanns Sjálfstæðisflokksins þegar hann var þingmaður fyrir hrun. Spyr Páll hvers vegna það hafi verið beðið í heila viku með að setja lögbann á umfjöllunina, hvort það hafi verið til að leyfa „slúðri“ Stundarinnar að grassera áður en lögbannið var sett á til þess að valda Sjálfstæðisflokknum hámarksskaða.

Davíð segir að ólíkt því sem gerðist í lekamálinu, þegar aðstoðarmaður Hönnu Birnu Kristjánsdóttur lak upplýsingum um hælisleitanda til fjölmiðla, séu viðbrögðin allt önnur í dag þegar ljóst sé að gögnum hafi verið lekið úr Glitni HoldCo:

Hvar voru all­ir ridd­ar­ar mál­frels­is­ins þá? Þeir sáu um und­ir­spilið fyr­ir rík­is­sak­sókn­ara og umboðsmann­inn! Þeir sömu sem nú nota hina ný­upp­götvuðu „leynd­ar­hyggju“ um flest mál til að leyna því hve fátt þeir hafa fram að færa, voru týnd­ir þá. Og hvar er sak­sókn­ar­inn núna? Er embætti hans orðið hreint dynta- og duttl­unga­embætti?,

spyr Davíð. Vitnar hann svo í orð Ingólfs Hauks­sonar, fram­kvæmda­stjóra Glitn­is HoldCo, sem sagði við Morgunblaðið að upplýsingarnar sem Stundin, Guardian og Reykjavik Media hafi unnið uppúr komi klárlega úr kerfum Glitnis fyrir hrun og hann óttist að þar megi upp­lýs­ing­ar um fjölda viðskipta­manna, það sé aðalástæðan fyrir lögbannsbeiðninni. Davíð segir svo að lokum:

Það blas­ir því við að upp­lýs­ingaþjóf­arn­ir hafa gögn um þúsund­ir manna en velta sér aðeins upp úr einu nafni til að reyna að af­baka yf­ir­stand­andi kosn­ing­ar.

Og Rík­is­út­varpið tek­ur full­an þátt í leikn­um eins og gegn öðrum for­sæts­ráðherra fyr­ir rúmu ári og viti menn, þá ein­mitt í sam­starfi við sömu kump­ána og núna. Þetta ástand get­ur vart öm­ur­legra verið.