Inga Sæland formaður Flokks fólksins er búin að koma sér í vandræði með ummælum sínum um óánægju eigenda höfundarréttarins að listaverkinu Sólfarinu við Sæbraut en stórri mynd af verkinu var varpað á skjá á haustþingi flokksins í Háskólabíói um helgina.
Fjörugar umræður hafa skapast um málið í netheimum þar sem heldur hallar á Ingu og flokk hennar. Egill Helgason tekur málið upp í pistli hér á Eyjunni þar sem hann lýsir aðdáun sinni á höfundi verksins, Jóni Gunnari Árnasyni, og segir síðan:
„Nú er deilt um notkun Flokks fólksins á þekktasta verki Jóns Gunnars, Sólfarinu. Flokkurinn notar flennimynd af því í pólitísku áróðursskyni. Allt virðist það vera vanhugsað, en dætrum Jóns Gunnars líkar þetta illa. Það hlýtur að vera þeirra að dæma um hvort slík notkun verksins sé eðlileg.“
Hann klykkir síðan út með því að tilfæra viðbrögð Ingu í samtali við RÚV og segir þau vera „dálítið á skjön.“
Það eru ekki síst þessi orð Ingu í samtali við RÚV sem hreyfa við þeim sem láta sig málið varða:
„Þetta er bara eitthvað verk sem er þarna niðri við sjó. Það stendur hvergi að það megi ekki taka myndir af verkinu. Þær systur ættu kannski bara að fara að setja upp skilti þar, svo að hinn almenni borgari viti að hann megi ekki taka mynd af því.“
Nokkrir leggja orð í belg á Facebook-síðu Egils. Þar segir Páll Ásgeir Ásgeirsson, rithöfundur og fjallagarpur:
Mér finnst að frú Sæland hefði vel getað gúglað lög um höfundarrétt í stað þess að svara með skætingi sem sýnir hroka og fáfræði.
Fjalar Sigurðarson, markaðsstjóri hjá Nýsköpunarmiðstöð Íslands, lætur heldur ekki sitt eftir liggja:
„Snýst ekkert endilega um „skoðun“ dætranna. Þetta heita lög. Mjög skýr. Sá sem býður sig fram til þings þarf að skilja hvað lög eru. Inga gera það greinilega ekki.“
Og blaðamaðurinn Andrés Magnússon bætir þessu við umræðuna:
Þetta myndi ekki vefjast fyrir neinum ef flokkurinn hefði notað Rúdolf með Þey í óleyfi undir auglýsingu. Hið sama á auðvitað við ef menn eru að propsa sig með þessum hætti, þar sem skúlptúrinn er notaður nánast sem einkennismerki. Tala nú ekki um þegar flokkur með óljósar þjóðernistilvísanir er að flagga víkingaskipi.
Gerður Kristný, rithöfundur og ljóðskáld, minnir á ljóð sitt um Sólfarið: Og ég sem orti um Sólfarið í Drápu: Sólfarið reif sig laust / og ruddist yfir fjörugrjótið // þríarma möstrin / teygðu sig / til himna // beinaber skrokkurinn / skreið út / á næturhafið.
Birgir Jóakimsson, verkefnastjóri hjá Íslandsstofu, svarar Ingu síðan fullum hálsi á sínum Facebook-vegg, tengir einnig í frétt RÚV:
Úps! Byrjar ekki vel. Snillingurinn Jón Gunnar Árnason skapaði Sólfarið sem er orðið eitt af helstu kennileitum Reykjavíkur. Þetta er ekki bara EITTHVAÐ verk. Eitthvað segir mér að ekki muni margir listamenn og hönnuðir kjósa Flokk fólksins.
