„Við búum við ákveðna tegund af löggjöf í þessum efnum, á höfuðborgarsvæðinu einskorðum við okkur við leyfi fyrir 550 leigubíla. Þannig að þetta er ákveðin aðgangshindrun og það er það sem eftirlitsstofnun EFTA er að benda á í sínu áliti um norska leigubílalöggjöf sem svipar til okkar, að þetta feli í sér aðgangshindrun á markað.“

Þetta sagði Pawel Bartoszek þingmaður Viðreisnar í Morgunútvarpinu á Rás 2 í morgun þar sm hann ræddi um fyrirspurn sína til samgönguráðherra um viðbrögð við áliti EFTA um löggjöf um leigubílaakstur. Segir Pawel að vissulega sé um að ræða álit um löggjöf annars ríkis en það gefi tilefni til að skoða kerfið hér á landi upp á nýtt. Varðandi áhyggjur leigubílstjóra sem stóðu fyrir málþingi nýverið þar sem varað var við ólöglegum leigubílaakstri segir Pawel:

Þarna er hugsanlega verið að tala um það að markaðurinn er að koma inn og fylla ákveðið gat. Þessi þjónusta í dag er kannski ekki lengur að standast tímans tönn. Persónulega fagna ég ekki að menn séu með einhverja síðu sem er á gráu svæði en þess þá heldur að endurskoða löggjöfina þannig að þetta sé hægt að gera svona hluti kannski örlítið meira löglega.

Pawel segir það vel koma til greina að halda svipaðri umgjörð og er nú, það þurfi leyfi og fara á námskeið en að komið sé í veg fyrir fjöldatakmarkanir á fjölda leyfa sem Pawel segir gera meira ógagn en gagn, þá sérstaklega fyrir neytendur. Pawel segir að takmörkun sem þessi sé eingöngu gerð fyrir þá sem séu með leyfi og koma í veg fyrir samkeppni sem geti verið þeim hvimleið. Aðspurður hvort það eigi ekki einfaldlega að fjölga leyfunum í takt við fjölda ferðamanna:

Jú það yrði tiltölulega auðveld aðgerð. Ráðherra gæti gert það með að því skrifa undir nýja reglugerð. Fyrir utan að þá þyrftum við að ákveða hvernig við myndum úthluta þessum nýju leyfum, draga eða bjóða upp, jú það væri skammtímalausn en ég spyr mig einfaldlega hver sé þörfin fyrir að takmarka þessi leyfi? Þetta er ekki eins og kvótakerfið þar sem auðlindin er takmörkuð, þarna er hindrunin augljóslega gervileg.