Rúm 65% Íslendinga telja efnahagsstöðuna á Íslandi í dag vera góða en 35% telja að hún sé slæm. Þetta sýnir ný könnun MMR.
Af körlum sögðu 70% efnahagsstöðuna vera góða en 60% kvenna.
Tæp 57% svarenda töldu að efnahagsstaðan á Íslandi verði svipuð og í dag eftir 6 mánuði. Rúm 16% töldu að efnahagsstaðan yrði betri eftir 6 mánuði en 27% að hún yrði verri.
Konur, 28%, reyndust ívið líklegri en karlar, 26%, til að telja að efnahagsstaðan muni versna næstu 6 mánuði. Af körlum töldu 19% að efnahagsástandið myndi batna, samanborið við 14% kvenna.
Hærra hlutfall karla en kvenna taldi efnahagsstöðuna á Íslandi í dag vera góða. Af körlum sögðu 10% efnahagsstöðuna vera mjög góða og 60% frekar góða samanborið við 5% kvenna sem sögðu efnahagsstöðuna mjög góða og 55% frekar góða.
Aldurshópurinn 18-29 ára reyndist líklegri en aðrir aldurshópar til að segja efnahagsstöðuna slæma. Í aldurshópnum 18-29 ára töldu 47% að efnahagsstaðan væri slæm, þar af töldu 16% að efnahagsstaðan væri mjög slæm. Aldurshópurinn 68 ára og eldri var líklegri en aðrir til að telja efnahagsstöðuna vera mjög góða eða 16%. Til samanburðar töldu 8% í aldurshópnum 50-67 ára efnahagsstöðuna vera mjög góða og 6% þeirra í aldurshópunum 30-49 ára og 18-29 ára.
Íslendingar í sérfræðistörfum, 77%, voru líklegri en aðrir til að telja efnahagsstöðuna góða en námsmenn, 49%, voru líklegastir til að telja hana slæma.
Stuðningsfólk Sjálfstæðisflokks, 87%, og Viðreisnar, 87%, var töluvert líklegra en stuðningsfólk annarra flokka tl að telja efnahagsstöðuna góða. Af stuðningsfólki Pírata töldu 25% að efnahagsstaðan væri mjög slæm.
Eldra fólk svartsýnna
Konur, 28%, reyndust ívið líklegri en karlar, 26%, til að telja að efnahagsstaðan muni versna næstu 6 mánuði. Af körlum töldu 19% að efnahagsástandið myndi batna, samanborið við 14% kvenna.
Þau í aldurshópnum 68 ára og eldri voru nokkuð líklegri til að telja að efnahagsstaðan muni versna á næstu 6 mánuðum eða 34% og aðeins 8% töldu að hún ætti eftir að batna.
Af stjórnendum og æðstu embættismönnum töldu 34% að efnahagsstaðan yrði svipuð eftir 6 mánuði, samanborið við 62% þjónustu-, skrifstofufólks, tækna og þeirra sem ekki voru útivinnandi. 31% stjórnenda og æðstu embættismanna töldu að efnahagsstaðan eigi eftir að batna en 35% að hún muni versna.
Af stuðningsfólki Viðreisnar töldu 44% að efnahagsstaðan eftir 6 mánuði verði svipuð og í dag, samanborið við 63% stuðningsfólks Samfylkingar og 62% Sjálfstæðismanna. Stuðningsfólk Viðreisnar, 29%, og Sjálfstæðisflokks, 27%, reyndist líklegra en aðrir til að telja að efnahagurinn muni batna á næstu 6 mánuðum en einungis 7% stuðningsfólk Samfylkingar taldi að efnahagurinn myndi batna. Stuðningsfólk Vinstri grænna, 35%, var aftur á móti ívið líklegra en aðrir til að telja efnahagsstöðuna eiga eftir að versna næstu 6 mánuði.
Könnunin fór fram dagana 11.-26. apríl. 926 einstaklingar, 18 ára og eldri, valdir af handahófi tóku þátt.
