Ársreikningur Reykjavíkurborgar fyrir árið 2016 sýnir að rekstur borgarinnar fer batnandi en rekstrarsamstæða borgarinnar skilar jákvæðum rekstri upp á 26,5 milljarða, sem er 15 milljörðum betri en áætlað var. Í bókun borgarráðsfulltrúa Sjálfstæðisflokksins segir að þetta sé ekki seinna vænna, rekstur Reykjavíkurborgar hafi verið í algjörum ólestri allt þetta kjörtímabil sem og kjörtímabilið 2010-2014. Allt frá árinu 2010 hafi vandræðagangur verið á rekstrinum með of slöku rekstraraðhaldi því rekstrarvandræði borgarinnar hafa verið útgjaldavandi en ekki tekjuvandi.
Halldór Halldórsson oddviti Sjálfstæðisflokksins segir í samtali við Eyjuna að hann viðurkenni fúslega að borgin standi betur, en þó ekki jafn vel og nágrannasveitarfélögin. Árið 2016 sé gert upp með rekstrarafgangi og væri það ótrúlegt ef slíkt tækist ekki miðað við þá gríðarlegu tekjuaukningu sem orðin er í íslensku samfélagi og sjá má á jákvæðri rekstrarniðurstöðu sveitarfélaga um land allt.
Lakari rekstarárangur en í nágrannasveitarfélögunum
Þegar rekstur Reykjavíkurborgar, langstærsta sveitarfélags landsins, sé borinn saman við fjögur stærstu nágrannasveitarfélögin megi sjá að rekstrarárangur borgarinnar sé lakari en hjá þessum sveitarfélögum þrátt fyrir hærri tekjur af hverjum íbúa í borginni. Skatttekjur á hvern íbúa borgarinnar eru 624.000 kr. en meðaltal hinna sveitarfélaganna er 488.000 kr. á hvern íbúa þeirra. Þá er veltufé frá rekstri Reykjavíkurborgar 10,9% sem er til bóta frá alltof lágu veltufé árin á undan en meðaltal hinna sveitarfélaganna er 13,15%. Þá megi einnig hafa á huga að Reykjavíkurborg leggur hámarksútsvar á íbúa sína en meðaltal hinna sveitarfélaganna er undir lögbundnu hámarksútsvari. Þar að auki hafi skuldir A-hluta borgarsjóðs aukist um 3 milljarða á milli áranna 2015-2016 á sama tíma og skuldir hinna sveitarfélaganna standa í stað eða lækka.
Halldór segir í samtali við Eyjuna að það skorti rekstrarhugsun hjá meirihlutanum í borgarstjórn:
Það er stöðugt verið að auka útgjöld til verkefna sem eru ekki lögbundin. Til dæmis á nú að fara að niðurgreiða einhverjar siglingar á milli Reykjavíkur og Akraness. Við þurfum að reyna að koma í veg fyrir slíkt. Við viðurkennum að þetta hefur batnað en við bendum líka á að þetta hefur batnað meira hjá öðrum. Það þarf rekstrarhugsun.
Heimatilbúinn skortur á húsnæði
Í borgarráði í dag svo tekin fyrir tillaga borgarfulltrúa Sjálfstæðisflokksins frá 7. febrúar síðastliðnum um fjölgun lóða í Úlfarsárdal, segjast Sjálfstæðismenn undrandi á þetta mál hafi beðið í tæpa þrjá mánuði einungis til að vera fellt af meirihlutanum. Segir Halldór þennan seinagang undirstrikar þann vandræðagang sem einkenni meirihlutann í húsnæðis- og lóðamálum hjá Reykjavíkurborg. Nú vanti allt að 5000 íbúðir og svo vel yfir 1000 íbúðir árlega alveg til ársins 2030 miðað við stöðu mála í dag og áætlanir.
Þrátt fyrir þessa stöðu haldi meirihlutinn sig við óbreytta stefnu um að úthluta ekki nýjum lóðum heldur styðjist nánast eingöngu við lóðir á þéttingarsvæðum þar sem ljóst er að íbúðir eru miklum mun dýrari en ef borgin úthlutaði sjálf fleiri lóðum. Segir Halldór að skortur í húsnæðismálum og óeðlilega mikil þensla á húsnæðismarkaði markist af heimatilbúnum skorti.
