Brynjar Níelsson þingmaður Sjálfstæðisflokksins styður ráðherraskipan ríkisstjórnar Sjálfstæðisflokks, Viðreisnar og Bjartrar framtíðar en segist vissulega hafa viljað verða ráðherra. Í pistli á Pressunni segir Brynjar að sjaldan séu menn á eitt sáttir þegar kemur að vali í ráðherraembætti, hans sjónarmið hafi ekki orðið ofan á að öllu leyti í þetta sinn en hann styðji þessa ráðherraskipan þar sem úrvalsfólk sé á ferð.

Það vakti mikla athygli nú í morgun þegar Páll Magnússon oddviti Sjálfstæðisflokksins í Suðurkjördæmi lýsti því yfir opinberlega að hann styddi ekki ráðherraskipanina, sagði Páll skipan ráðherra ganga gegn því lýðræðislega umboði sem þingmenn Sjálfstæðisflokksins hefðu áunnið sér í prófkjörum og síðan kosningum í haust og að hún fæli í sér lítilsvirðingu gagnvart Suðurkjördæmi þar sem Sjálfstæðisflokkurinn vann sinn stærsta sigur í kosningunum. Eru þetta vond tíðindi fyrir ríkisstjórn með eins manns meirihluta á þingi. Brynjar segir hins vegar:

Nú þurfa þingmenn flokksins að fylkja sér um ráðherrana og styðja þá til góðra verka fyrir land og þjóð og láta persónulegar skoðanir og metnað ekki trufla sig um of.

„Óþarfamál“ í stjórnarsáttmálanum

Í samtali við DV í dag segir Brynjar fundinn í gær þar sem Páll lýsti þessu yfir ekki hafa verið hitafund, hann sjálfur hafi helst hafa viljað verða dómsmálaráðherra en hann treysti Sigríði Á. Andersen mjög vel en í prinsippinu finnist honum að reynsla og umboð eigi að gilda umfram kynjasjónarmið við skipun ráðherra.

Varðandi stjórnarsáttmálann segist Brynjar því alfarið ósammála að Sjálfstæðisflokkurinn eigi hann með húð og hári, engar skattalækkanir séu þar að finna og að Bjarni Benediktsson gæti aldrei farið til Brussel til að biðja um aðildarviðræður við Evrópusambandið ef það yrði samþykkt í þjóðaratkvæðagreiðslu. Hann segir hins vegar að allir flokkar ættu að geta kvittað upp á 90% af stjórnarsáttmálanum, sem innihaldi engin „gælumál“ Sjálfstæðisflokksins líkt og hinna flokkanna:

Þarna eru óþarfamál. Til dæmis þessi helvítis jafnlaunavottun. Það er algjörlega fráleitt. Menn á frjálsum markaði semja sín á milli.

Ari Brynjólfsson – ari@pressan.is