Getur verið að fjármálaráðuneytið telji að meðalmáltíð á einstakling kosti 209 krónur, ekki 248 krónur, eins og hefur verið í umræðunni.
Gylfi Magnússon, hagfræðingur og fyrrverandi viðskiptaráðherra, setur eftirfarandi inn á Facebook síðu sína.
Það er ekkert skrýtið að fjármálaráðherra kannist ekki við að hafa miðað við að meðalmáltíð kostaði 248 krónur. Hann virðist nefnilega sjálfur hafa miðað við 209 krónur og 24 aura. Þetta má sjá á meðfylgjandi glæru úr kynningu hans á fjárlagafrumvarpinu. Þar er miðað við að hækkun virðisaukaskatts á matvæli kosti fjögurra manna fjölskyldu 3.520 krónur á mánuði. Það samsvarar því að fjölskyldan noti nú 75.328 krónur á mánuði í matvæli með 7% virðisaukaskatti. Miðað við 30 daga í mánuði og 3 máltíðir á dag gerir það 209,24 krónur á máltíð. Þetta er auðvitað fjarstæðukennd forsenda og með öllu óskiljanlegt hvernig mönnum tókst að reikna sig niður í svona lága tölu.