Þessi mynd er af vefnum 101Reykjavík og sýnir Aðalstræti á sjötta áratugnum, það er byrjað að byggja Moggahöllina – sem aldrei skyldi verið hafa.

Við sjáum glöggt hvernig Fjalakötturinn leit út. Í honum var elsta kvikmyndahús Íslands og var þá nefnt Reykjavíkur Biografitheater. Húsið hét annars Breiðfjörðshús, eftir Valgarði Ö. Breiðfjörð. Það var rautt á litinn.

Fjalakötturinn var rifinn 1985, eftir langvinnar deilur. Líklega myndi engum detta í hug að eyðileggja svo glæsilegt hús í dag. Niðurlæging þess var reyndar talsverð – á neðstu hæðinni var starfræktur leiktækjasalur undir það síðasta.

Í baksýn sést yfir Grjótaþorpið. Þetta litla hverfi er afskaplega fallegt núna, hús eru uppgerð og vel við haldið. En þegar ég var að alast upp stóð manni frekar stuggur af Grjótaþorpinu. Þarna bjó fátækt fólk, margir áttu við allskonar vandamál að stríða. Húsin voru illa máluð og niðurnídd.

Merkileg er svo sagan af ungum Frökkum sem fluttu til Íslands í kringum 1970. Þeir bjuggu sumir í Grjótaþorpinu, föttuðu sjarma þess, og áttu stóran þátt í að reisa það til vegs og virðingar.