Það eru liðin hátt í fjögur ár frá hruni – og það er farið að fenna yfir ýmislegt.

Eitt af því sem maður var farinn að gleyma eru hinar skelfilegu lýsingar á því hvernig Sparisjóði Keflavíkur var stjórnað.

Ríkisútvarpið rifjaði þetta upp í gærkvöldi – og maður spyr sig: Hvers vegna í ósköpunum er ekki löngu búið að efna til lögreglurannsóknar á þessari starfsemi?

„Fréttastofa RÚV sagði í kvöld frá kolsvartri skýrslu Price Waterhouse Coopers, sem unnin var um starfshætti Sparisjóðsins í Keflavík að beiðni Fjármálaeftirlitsins. Samkvæmt henni stóð ekki steinn yfir steini í starfsemi sjóðsins. Sparisjóðsstjórinn var nær einráður og stjórn og lánanefnd sjóðsins nánast upp á punt. Stjórinn samþykkti háar lánveitingar sem hafði verið hafnað í lánanefnd og breytti skilmálum lána sem hann hafði ekki heimild til.

Stjórnarmenn og starfsmenn fengu háar lánveitingar án trygginga og haldbærra veða, og börn sparisjóðsstjórans sömuleiðis. Vegna vinnubragðanna afskrifaði sjóðurinn ríflega sjö milljarða króna síðustu tvö árin fyrir fall hans og færði niður útlán fyrir röska átján milljarða króna.“