Það er fjölmiðlafólk sem mest áberandi þegar horft er til frambjóðenda gegn Ólafi Ragnari Grímssyni. Það er eins og gengur – fjölmiðlar eru mjög sjálfhverfir. Og þegar staðan er eins og núna – að það er fyrst og fremst verið að leita að „einhverjum“ sem gæti fellt Ólaf er kannski vonlegt  að fjölmiðlafólk sem sífellt er í sviðsljósinu komi fyrst upp í hugann.

En það eru fleiri staðir á Íslandi en fjölmiðlarnir.

Innan háskólasamfélagsins hafa verið nokkrar vangaveltur um forsetakjör. Sagt er að nokkur hreyfing sé í kringum Kristínu Ingólfsdóttur, rektor Háskólans – að talsvert sé rætt um að fá hana í framboð.

Annar hugsanlegur frambjóðandi sem er nefndur er Páll Skúlason, prófessor í heimspeki og fyrrverandi rektor. Sumir segja að heimspekingur sé einmitt það sem Íslendingar þurfa í embættið á þessum tíma – maður sem getur talað af alvöru við þjóðina um erfið álitamál. Þá er líka hægt að horfa til Írlands – annars lands sem lenti í efnahagshruni –  þar sem skáld og heimspekingur var kjörinn forseti nýskeð.

Svo er líka sagt að Páll geti haft annan kost. Hann er fæddur 1945 og myndi varla sitja mörg kjörtímabil í embætti. Og það er ólíklegt að Páll yrði einhvers konar Séð & heyrt forseti.

Páll Skúlason