Það er svosem ekki víst að VG klofni eftir atburði síðustu daga – en líkurnar á því að fólkið sem nú skipar þingflokkinn verði saman á framboðslistum í næstu kosningum fara hraðminnkandi.

Þráinn Bertelsson lýsti ástandinu innan VG í Silfrinu í dag. Hann talaði um að Steingrímur og Ögmundur gætu ekki unnið saman – og að í ellefu manna þingflokki héldu níu manns saman annars vegar og þrjú hins vegar, Ögmundur, Guðfríður Lilja og Jón Bjarnason. Þráinn telur eðlilegast að þau fari sinn veg.

Milli þremenninganna, Lilju Mósesdóttur og Atla Gíslasonar liggja svo gagnvegir. Ásmundur Einar Daðason er hins vegar kominn í Framsókn.

Það er þá spurning hvað Ögmundur – foringi hópsins – muni gera ef hann vill halda áfram í pólitík. Gengur hann til liðs við Lilju – eða vill hann hafa sitt eigið stjórnmálaafl?

Innan Samfylkingarinnar hafa líka komið fram brestir. Þar eru innandyra þingmenn sem eru í raun komnir á línu Sjálfstæðisflokksins í fjölda mála. Þar fara fara fremstir svokallaðir Vaðlaheiðardrengir, Kristján Möller og Sigmundur Ernir Rúnarsson. Ingibjargararmurinn innan flokksins er mjög vansæll – og það er ekki vitað hvar Árni Páll Árnason lendir eftir að hafa verið settur út úr ríkisstjórninni.

Jóhanna þykir vera mjög úr tengslum við þingflokkinn – það er sagt að það séu eiginlega bara tveir menn sem hafi beinan aðgang að henni, Hrannar B. Arnarson og Steingrímur J. Sigfússon. Öfl innan flokksins vinna að því hörðum höndum að koma Jóhönnu úr formannssætinu svo hægt sé að ganga til kosninga með nýjan formann. Engin samstaða er þó um hver það gæti verið.

Þannig að það er alls staðar uppnám á vinstri vængnum, kannski liggja flokkslínurnar einfaldlega rangt?

Ögmundarfólkið virðist eiga ágætlega heima í þjóðlegum flokki með til dæmis Guðna Ágústssyni, Sigmundi Davíð Gunnlaugssyni, Styrmi Gunnarssyni og Davíð Oddssyni.

Sigmundur Ernir, Kristján Möller og fleiri innan úr Samfylkingu gætu alveg eins verið í flokki með Tryggva Þór Herbertssyni, Ólöfu Nordal og Bjarna Benediktssyni.

En Steingrímur J., Katrín Jakobsdóttir, Árni Þór Sigurðsson, Álfheiður Ingadóttir og Björn Valur Gíslason væru kannski ekki illa í sveit sett í flokki með Jóhönnu Sigurðardóttur og vinstri hlutanum af Samfylkingunni.

Þannig má svosem lengi draga línur, en þær virðast valda mörgum óhamingju eins og þær liggja núna.