Obama Bandaríkjaforseti er ekki vinsæll maður, Repúblíkanar þoldu hann náttúrlega aldrei – og hann hefur ekki staðið við fyrirheit sem gefin í kosningabaráttunni fyrir fjórum árum. Obama hefur engu bylt, hann er reyndar í greipum fjandsamlegs þings, en hann hefur reynst vera mikill vinur Wall Street – tök fjármálanna og stórfyrirtækjanna á bandarískum stjórnmálum eru sterkari en nokkru sinni.
Fyrir ári var stærsta málið í bandarískri pólitík stærð ríkisins og skuldir þess. Á merkilegan hátt hefur þetta verið að breytast í aðdraganda kosninganna – og að sumu leyti Obama í hag. Stóra málið núna er ójöfnuður í Bandaríkjunum. Hinir ofsaríku verða ríkari meðan hlutur millistéttarinnar skerðist. Þetta er þróun sem hefur staðið lengi yfir, en þegar fór að þrengja verulega að í hagkerfinu varð hún meira áberandi.
Það er sagt að tekjur 1 prósents hinna ríkustu hafi hækkað um 278 prósent síðustu þrjá áratugina, þeir þéna nú 21 prósent af tekjum samfélagsins – hlutfallið var 9 prósent fyrir 30 árum. Á móti hafa tekjur 60 prósentanna sem eru í miðjunni hækkað um 40 prósent.
Og þetta er farið að setja mark sitt á kosningarnar. Mitt Romney er ríkastur frambjóðendanna, hann er fjármálamaður sem veit ekki aura sinna tal – og nú er honum legið á hálsi fyrir þetta í forkosningum Repúblikana. Auðsöfnun hefur yfirleitt þótt jákvæð í þeim herbúðum. Andstæðingur hans, Newt Gingrich, hefur rekið kosningabaráttu sína að miklu leyti með fjandsamlegum auglýsingum í garð Romneys.
Gingrich uppsker og vinnur stóran sigur í forkosningunum í Suður-Karólínu. Gingrich er reyndar sá frambjóðandi Repúblikana sem er óvinsælastur meðal almennings – meira en 60 prósent kjósenda þola hann ekki. Hann á enga möguleika á að vinna Hvíta húsið – Romney virðist eini frambjóðandi Repúblikana sem er fær um það. Gingrich er mikill leikari – en það er sagt að hann hafi verið sá frambjóðendanna sem virkaði álíka reiður og kjósendurnir í Suður-Karólínu.
Obama ætti að vera í skýjunum vegna þess hvernig frambjóðendur Repúblikana fara með hver annan. Við endurtalningu kom í ljós að Rick Santorum vann í raun í Iowa – mönnum virðast einkennilega mislagðar hendur við þessar kosningar – og nú sigrar Gingrich í Suður-Karólínu þar sem kjósendur eru upp til hópa íhaldssamir, kristilegir og hallir undir Teboðið.
Ron Paul fékk lítið fylgi – frjálshyggjuboðskapur og ræður gegn stríðsrekstri eiga lítt upp á pallborðið meðal þessa fólks.
Næst er Flórída – 31. janúar.
Newt Gingrich fagnar sigri í Suður-Karólínu.
