Við erum líklega flest þannig að okkur þykir vændi ógeðfellt – og sorglegt.

Þess vegna er líka auðvelt að skera upp herör gegn vændi, kannski með vanhugsuðum hætti.

Vísir birtir viðtal við Pye Jakobsson, sem er í hagsmunasamtökum fólks sem stundar vændi í Finnlandi og Svíþjóð.

Hún færir ansi sterk rök fyrir því að sænska leiðin svokölluð sé til ógagns og ýti beinlínis undir mansal. Íslendingar og Norðmenn hafa tekið upp þessa sömu löggjöf.

Vísir hefur eftir Pye að með því að gera vændiskaup ólögleg sé vændið rekið dýpra niður í undirheima. Það sé komið í veg fyrir að mansal sé tilkynnt eða ofbeldi gegn vændiskonum. Slíkar tilkynningar berist aðallega frá vændiskaupendum.

Það er umhugsunarefni hvort þessi aðferð til að frelsa vændiskonur frá hlutskipti sínu virki beinlínis öfugt. Í Vísisfréttinnni segir:

„Leggjum siðferðið til hliðar. Það verður að tala við fólkið sem vinnur í kynlífsiðnaðinum því það hefur hugmyndir um hvað er hægt að gera. Og með því að gera viðskiptavini vændisfólks að glæpamönnum missum við helstu uppsprettu upplýsinga. Það var gerð rannsókn á ábendingalínu í Tyrklandi þar sem hægt var að tilkynna um mansal. Rannsóknin tók heilt ár. Meira en 80% þeirra sem hringdu inn voru viðskiptavinir. Því það eru þeir sem hitta þessar konur, karla og transfólk. Glæpavæðingin tekur burt tækifærið til að fá svona upplýsingar.“