Hjólreiðar eru ekki hátt skrifaðar á Englandi.
Ólympíuleikarnir í London eru að hefjast um helgina – og hefur margt verið ritað um öryggisgæslu og drottnun stórfyrirtækja. Það er spurt hvort áhorfendur verði handteknir ef þeir sjást með pepsidós.
Englendingar hafa nú fengið ágætan upptakt að leikunum.
Það er ekki það sem þeir vonuðust eftir. Þeir þrá að þeirra menn vinni sigra á stórmótum fótboltalandsliða eða í Wimbledonkeppninni í tennis.
En það gerist aldrei.
Hins vegar sigraði Englendingurinn Bradley Wiggins í Tour de France hjólreiðakeppninni fyrir fáum dögum. Hann er fyrsti Englendingurinn sem vinnur keppnina.
Tour de France er reyndar einn æsilegasti íþróttaviðburður í heimi. Sumar dagleiðirnar eru ótrúlega erfiðar. Hið 1912 metra háa Ventoux-fjall í Suður-Frakklandi er ekki bara bratt, heldu er það líka óhemju vindasamt. Það þykir erfiðasta leiðin í Tour de France og mörgum hefur orðið flatt á því. Lyfjaneysla hefur skyggt á keppnina, en það sama á við um Ólympíuleikana – þeir voru lengi gegnsýrðir af lyfjum og svindli og eru kannski enn.
