Það er mjög sérstakt að sjá hvernig er reynt að sá fræjum tortryggni í garð Ríkisútvarpsins vegna lítillar umfjöllunar um byggðastyrki ESB í Landanum.
Það er líkt og hópur manna líti á það sem svik að fjallað sé um ESB öðruvísi en að mála skrattann á vegginn. Samt erum við ekki bara með umsókn í gangi um aðild að sambandinu – sem var samþykkt með meirihluta á Alþingi – heldur höfum við líka aukaaðild að ESB í gegnum EES samninginn.
Nú fer þingmaðurinn Ásmundur Einar Daðason fram á að gefnar séu upplýsingar um tengsl Ríkisútvarpsins við ESB. Ásmundur er formaður Heimssýnar, samtaka sem berjast gegn ESB aðildinni. Heimssýn hefur fengið styrk upp á margar milljónir frá Alþingi til að stuðla að opinni umræðu um ESB – og það hefur Evrópuvaktin líka fengið.
En hvað varðar sjálfan mig – einn starfsmann Rúv sem spurt er um – þá hef ég aldrei farið í ferð á vegum Evrópusambandsins, aldrei hitt sendiherra ESB á Íslandi, aldrei hitt forstjóra Evrópustofu og aldrei komið í Evrópustofu, enda veit ég ekki hvar hún er til húsa.
Og ég hef heldur ekki þegið fjárframlög frá ESB.
